Kókshetaýlyq bala kezde taýyp alǵan mamonttyń súıegin murajaıǵa tapsyrdy
KÓKShETAÝ. QazAqparat - Kókshetaý qalasynyń turǵyny Aqmola oblystyq-ólketaný murajaıyna mamonttyń súıegin tapsyrdy, dep habarlaıdy QazAqparat tilshisi.
Kókshetaý qalasynyń 25 jastaǵy turǵyny Dýlat Mustafın mamonttyń jambas súıegi men atlant - birinshi omyrtqasynyń bólshegin murjaıǵa tapsyrdy.
Dýlat Mustafınniń aıtýynsha, kóne janýardyń súıegi onyń úıinde uzaq jyldar saqtalǵan. Súıekti bala kezinde Ǵabıt Músirepov aýdanyndaǵy Salqynkól aýylyna týystaryna barǵanynda taýyp alǵan. Aqqanburlyq ózenine sýǵa shomylyp, júrgende jardan súıekterdiń shyǵyp turǵanyn kórgen.
«Biz balalar súıekti qazyp alyp, ony estelik retinde bólip aldyq. Biri tisin, biri múıizin alsa, men eki súıegin aldym. Keıin murajaıǵa aparyp tapsyrǵym keldi. Alaıda, ol kezde jas bolǵandyqtan dostaryma kórsetip soǵan maqtanyp júrdim. Súıektiń mamontiki ekenine eshkim senbedi. Murjaǵaı tapsyrýǵa ýaqytym da bolmady. Biraz jyl ótken soń, joldasym súıekterdi laqtyryp jiberýdi usyndy. Sol kezde ǵana baryp, murajaı tapsyrdym. Shynymdy aıtsam, súıekterdiń qundy ekenin bilmedim», dep aıtty D.Mustafın QazAqparat tilshisine.
Murajaı qyzmetkerleriniń aıtýynsha, mamonttar osydan 15 myń jyl buryn ómir súrgen. Bular sol kezde Qazaqstan aýmaǵynda mekendegen piltumsyqtylar qataryndaǵy sońǵy janýarlar. Osy kúni mamont súıekteriniń qaldyqtary Aqmola oblysynyń aýmaǵy men Astana qalasynyń mańynda tabylyp otyr.
Buǵan deıin Jaqsy jáne Shortandy aýdandarynyń aýmaǵynan da mamonttardyń qańqasy tabyldy. Biraq ol súıekter durys saqtalmaǵan. Al myna súıek jaqsy saqtalǵan.
«Súıekke qarap, bul eresek mamonttiki ekenin ańǵarýǵa bolady. Dýlat bizge súıek tabylǵan jerdi kórsetetini týraly ýáde berdi. Astana ǵalymdarymen habarlasyp, aldaǵy jyldyń jazynda sol jerde qazba jumystaryn júrgizýdi josparlap otyrymyz», - deıdi Aqmola oblystyq ólketaný murajaıynyń dırektory Qýanysh Shaqshaqov.
Avtory: Oksana Matasova
