Kókshetaýlyq áıeldi úıiniń kire berisinde zorlamaqshy bolǵan kúdikti ustaldy

KÓKShETAÝ. QazAqparat – Kókshetaý turǵynyn óz úıiniń kire berisinde zorlamaqshy bolǵan 26 jastaǵy er adam ustaldy, dep habarlaıdy QazAqparat tilshisi Aqmola oblystyq Polıtsııa departamentiniń baspasóz qyzmetine silteme jasap.

Vedomstvonyń málimetinshe, 12-18 naýryz aralyǵynda oblys aýmaǵynda qylmysqa qarsy kúresti kúsheıtý, qoǵamdyq oryndarda quqyq buzýshylyqtardyń aldyn alý jáne jolyn kesý maqsatynda «Quqyq tártibi» jedel aldyn alý is-sharasy ótip jatyr. Shara barysynda polıtsııa qyzmetkerleri zorlaýǵa áreket jasaǵan kúdiktini anyqtady.

«Naýryzdyń 13-de saǵat 03:00 Kókshetaý qalalyq polıtsııa basqarmasynyń kezekshi bólimine oblys ortalyǵynyń turǵynan aryz tústi. Onda aryz ıesi belgisiz berýdiń ózine seksýaldyq sıpattaǵy zorlyq-zombylyq jasaýǵa tyrysqany týraly aıtty. Belgili bolǵandaı, áıel uıqysyzdyq dertine shaldyqqan jáne túnde serýendeýge shyqqan eken. Sol kezde oǵan úıiniń kireberisinde beıtanys er adam tap berip, kıimin sheship zorlamaqshy bolǵan. Kómekke kelgen kórshilerdiń kómeginiń arqasynda áıel zorlaýshydan qutylǵan», - dedi vedomstvodan.

Jedel-izdestirý sharalary barysynda polıtseıler beınebaqylaý kamerasyndaǵy jazba arqyly kúdiktini anyqtady. Ol 26 jastaǵy, buryn sottalǵan, Býrabaı aýdanynyń turǵyny bolyp shyqty.

«Osyǵan baılanysty Qylmystyq kodekstiń 24 babynyń 3 bóligi, 120-babynyń 1 bóligi «zorlaý áreketi» boıynsha sotqa deıingi is qozǵaldy», - dep tolyqtyrdy vedomstvodan.