Kókshetaýlyq aıaqdopshylar Reseı jáne Serbııa komandalarymen kúsh synasty
ALMATY. 13 aqpan. QazAqparat - Keshe Kókshetaýdyń «Oqjetpes» fýtbol komandasy Túrkııanyń Antalııa qalasynda ótkizip jatqan oqý-jattyǵý jıyny barysynda 2 baqylaý matchyn ótkizdi.
Onda kókshetaýlyqtar aldymen Sergeı Tashýev baptaıtyn Belgradtyń «Salıýt»-imen kezdesip 4:1 esebimen jeńilis tapty. Bıylǵy maýsymda Reseı ulttyq lıgasynda óner kórsetip júrgen belgradtyqtar ótken 2011/12 jyldardaǵy maýsymda Ekinshi dıvızıonnyń «Ortalyq» aımaǵynda jeńimpaz atanǵan edi.
Serik Ábdýalıev jattyqtyratyn «Oqjetpes» aıaqdopshylary budan keıin Aleksandr Krıstıch baptaıtyn Serbııanyń Krýshevats qalasynyń «Napredak» komandasyna 4:2 bolyp utyldy. Birinshi lıgada óner kórsetetin krýshevatstyqtar sońǵy eki maýsymda (2010/2011 jáne 2011/2012) da 6-shy oryn alǵan edi. Bıylǵy maýsymda 16 týrdyń 12-sin jeńispen aıaqtaǵan olar týnır kestesinde kósh bastap tur.
Úshinshi jıynyn 3 aqpanda bastaǵan kókshetaýlyqtar alǵashqy baqylaý matchyn 8 aqpan kúni Sofııa qalasynyń «Lokomatıv» komandasymen ótkizgen edi. Bolgarııanyń Joǵarǵy lıgasynda óner kórsetetin sofııalyqtar onda «Oqjetpes» qaqpasynan 3 ret sańylaý taýyp, 3:0 esebimen óz basymdyǵyn kórsetken bolatyn.
