Kókshetaýlyq «Arlan» hokkeı klýby Qurlyqaralyq kýbokta óner kórsetedi
KÓKShETAÝ. QazAqparat - Kókshetaýdyń «Arlan» HK klýby Qurlyqaralyq kýbokqa qatysady, dep habarlaıdy QazAqparat tilshisi.
Aqmola oblystyq dene shynyqtyrý jáne sport basqarmasy baspasóz qyzmetiniń málimetinshe, 2018 jyldyń 17-18 qarasha kúnderi Frantsııanyń Lıon qalasynda ótetin jarysta «Arlan» hokkeıshileri Qazaqstan atynan baq synaıdy.
«Bul - osydan 9 jyl buryn qurylǵan komandanyń IIHF qoldaýymen ótetin halyqaralyq jarysqa birinshi qatysýy. Sondyqtan, bul - Aqmola oblysy men Kókshetaý qalasyndaǵy «Arlan» HK jankúıerleri úshin ǵana emes, jalpy respýblıka úshin, qazaqstandyq hokkeı úshin eleýli oqıǵa», - deıdi Aqmola oblysynyń dene shynyqtyrý jáne sport basqarmasy baspasóz hatshysy Mahabbat Bolshına.
Toptyq kezeńde arlandyqtar Frantsııa, Latvııa jáne Belarýs Respýblıkasynyń «Lıon», «Kýrbads», «Gomel» sııaqty komandalarymen kezdesedi.
Kókshetaýlyqtar alǵashqy oıyndy 17 qarashada saǵat 00:30-de jergilikti «Lıon» HK-men, sol kúni keshkisin saǵat 19:00-de Latvııanyń «Kýrbads» HK-men jáne qarashanyń 18-i kúni saǵat 18:00-de belarýsterdiń «Gomel» HK ótkizedi.
Aıta keteıik, 2018 jyldyń sáýir aıynda Kókshetaýdyń «Arlan» hokkeı klýby Qazaqstan chempıonatynyń pleı-off serııasyndaǵy 6-shy fınaldyq kezdesýinde astanalyq «Nomad» komandasyn 1:0 esep aıyrmasymen jeńip, el chempıony atanǵan bolatyn.
