Kókshetaýlyq 3 mıllıon teńgeniń altyn buıymdaryn úptep ketken
KÓKShETAÝ. QazAqparat - Kókshetaýda 3 mıllıon teńgeniń altyn buıymdaryn qoldy qylǵan 27 jastaǵy kúdikti ustaldy, dep habarlaıdy QazAqparat tilshisi ІІD baspasóz qyzmetine silteme jasap.
Polıtseılerdiń deregi boıynsha qylmys aǵymdaǵy jyldyń shilde aıynda Kókshetaý qalasynda oryn alǵan. Aryzdanýshy áıeldiń sózinshe, qaskóı páter ıesiniń joqtyǵyn bilip, páterdegi altyn buıymdardy úptep ketken. Áıel qoldy bolǵan buıymdaryn 3 mıllıon teńgege baǵalady.
«Tergeý amaldary kezinde polıtseıler urynyń páter esigin sáıkes keletin kiltpen ashqany anyqtaldy. Alaıda, atalmysh úıdiń turǵyndary sol kúni kúdikti eshteme baıqamaǵanyn aıtty. Bul qylmysty tergeýde biraz qıyndyqtar týǵyzdy. Degenmen, polıtseıler júrgizgen keshendi jedel-izdestirý sharalarynyń nátıjesinde tamyzdyń 26-synda Kókshetaý qalasynyń 27 jastaǵy turǵyny qolǵa tústi.
«Kúdiktiden urlanǵan altyn buıymdardyń bir bóligi tárkilendi. Oǵan qosa, túrli qulyptardy buzyp ashatyn aspap anyqtaldy», dep túsindirdi baspasóz qyzmetindegiler.
Qazirgi kezde osyǵan baılanysty QR QK 188-babynyń 3-bóligi boıynsha sot aldy tergeý amaldary júrgizilýde. Sonymen qatar, kúdiktiniń osyǵan uqsas ózge qylmystarǵa qatysy bar-joǵy anyqtalýda.
