Kókshetaýlyq Gigabyte komandasy Jenevadaǵy baıqaýda baq synady
ASTANA. KAZINFORM — Jenevada ótip jatqan AI for Good Global Summit 2026 sammıti aıasyndaǵy Robotics for Good Youth Challenge 2025–2026 halyqaralyq jastar baıqaýynyń fınalynda Kókshetaý qalasynyń Gigabyte komandasy óner kórsetti. Qazaqstandyq top Senior sanaty boıynsha baq synady, dep habarlaıdy Kazinform agenttiginiń Jenevadaǵy menshikti tilshisi.
Qazirgi ýaqytta Gigabyte komandasy 535 upaı jınap, 28 komandanyń arasynda 4-orynda keledi.
Robotics for Good Youth Challenge — jas ınjenerler men ázirleýshilerge arnalǵan halyqaralyq baıqaý. Ony Halyqaralyq elektr baılanysy odaǵy (ITU) Mobsya kompanııasynyń (Thymio bilim berý robotyn ázirleýshi) qoldaýymen uıymdastyrady. Baıqaý robototehnıka men jasandy ıntellekt arqyly jahandyq ózekti máselelerdiń sheshimin usynatyn mektep oqýshylary men jastar komandalaryn biriktiredi. 2025–2026 jylǵy maýsymnyń negizgi taqyryby — azyq-túlik qaýipsizdigi.
BUU-nyń jasandy ıntellekt salasyndaǵy jetekshi alańy sanalatyn AI for Good Global Summit sammıti aıasynda ótip jatqan fınalǵa álemniń 39 elinen kelgen 68 komanda qatysyp jatyr. Qazaqstandyq Gigabyte komandasy Senior jas sanatynda azyq-túlik qaýipsizdigi máselelerin sheshýge arnalǵan robototehnıka men jasandy ıntellekt jobasyn tanystyrdy.
— Biz Robotics Challenge sanatynda óner kórsetip jatyrmyz. Bul baǵyt aıasynda eki negizgi tapsyrmadan turatyn robot oıyndary ótedi. Osy mıssııalardy oryndaý úshin komandamyz eki biregeı robotty ózimiz qurastyryp, jasap shyqtyq, — dedi Ábilmansur Bolat.
Jas ónertapqyshtyń aıtýynsha, robottardyń negizi Lego Spike konstrýktorynyń bazasynda jasalǵan. Alaıda komanda standartty bólshektermen shektelmeı, qurylǵylardyń tıimdiligin arttyrý úshin keıbir elementter men jańa modýlderdi ózderi jobalap, 3D-prınterde basyp shyǵarǵan.
Baǵdarlamalaý barysynda qıyndyq týyndamaǵan. Robottardy basqarýǵa arnalǵan barlyq baǵdarlamalyq kodty komanda músheleri Python Pybricks platformasy negizinde ózderi jazǵan.
— Bul biz úshin úırenshikti jumys. Robototehnıkamen aınalysyp júrgenimizge 5 jyldaı boldy, sondyqtan tájirıbemiz jetkilikti. Árbir jańa joba men árbir jańa robot bizdiń bilimimizdi tolyqtyra túsedi. Búgin bizdi úsh jarys kezeńi kútip tur. Maqsatymyz — jeńiske jetý, — dedi qazaqstandyq komandanyń ókili.
Senior sanatyndaǵy qorytyndy nátıjege sáıkes, Gigabyte komandasy 28 ujymnyń ishinde 4-orynǵa turaqtady. Qazaqstandyq komanda Vetnam, Senegal, Gana jáne Qytaı komandalarynan ozyp, tek Ońtústik Koreıa, Venesýela jáne Meksıka ókilderine ǵana ese jiberdi.
Qazaqstandyq komandanyń sátti óner kórsetýi eldegi jas ınjenerlerdiń joǵary deńgeıde daıarlanǵanyn kórsetip, Qazaqstannyń jasandy ıntellekt pen robototehnıka salasyna bilikti mamandar daıarlaý baǵytyndaǵy áleýetin taǵy bir márte dáleldedi.
Aıta keteıik, Qazaqstannyń elektr júıesin basqarýda jasandy ıntellekt qoldanyla bastady.
