Kókshetaýlyq egizder Ulttyq ulanda birge qyzmet etip júr
ASTANA. KAZINFORM — QR ІІM Ulttyq ulanynyń «Ortalyq» óńirlik qolbasshylyǵynyń 6505 áskerı bólimine jas sarbazdar legi keldi. Jas shaqyrylym arasynda aǵaıyndy egiz Konstantın Sýdıa men Fedor Sýdıa bar.
Ulttyq ulannyń baspasóz qyzmetiniń málimetinshe, Olar merzimdi áskerı qyzmetke birge baryp, ózderiniń azamattyq mindetterin birge oryndaýǵa sheshim qabyldapty.
Aǵaıyndylar 2007 jyly 2 maýsymda dúnıege kelgen jáne bala kezden juptary ajyramaǵan. Olar Aqkól qalasynyń № 2 orta mektebinde bilim alyp, keıin Kókshetaý kolledjinde «Aýyl sharýashylyǵyn mehanıkalandyrý» mamandyǵyn oqyp shyqqan.
Sýdıalar otbasynda úsh ul eken. Alaıda áskerı qyzmetke tek Konstantın men Fedor shaqyrylǵan, olardyń úlken aǵasy densaýlyǵyna baılanysty úıde qalǵan. Osyǵan qaramastan, egizder biraýyzdan qyzmetke baryp, el qaýipsizdigin qamtamasyz etýge úles qosý týraly sheshim qabyldaıdy.
— Búginde jas áskerı qyzmetshiler alǵashqy áskerı daıyndyq kýrsynan ótip, armııa ómirine beıimdelip keledi. Jas sarbazdar munda áskerı tártiptiń negizderin meńgeredi, jalpy áskerı jarǵylardy oqıdy, dene daıyndyqtaryn jetildiredi jáne qarý-jaraqpen jumys isteýdi úırenedi. Tájirıbeli ofıtserler jáne serjanttardyń basshylyǵymen olar odan ári qyzmetke qajetti bilim men daǵdylardy alady, — delingen habarlamada.
Konstantın men Fedordyń aıtýynsha, áskerı qyzmet jaýapkershilikti, tártipti jáne minezdi tárbıeleýge múmkindik beretin árbir jas jigittiń ómirindegi mańyzdy kezeń sanalady. Qyzmet aıaqtalǵannan keıin aǵaıyndylar «Sarbaz 2.0» bilim berý baǵdarlamasynyń múmkindikterin paıdalanýdy josparlap otyr. Bul baǵdarlama merzimdi áskerı qyzmette erekshelengen sarbazdarǵa tegin oqý grantyn alýǵa múmkindik beredi.
Jas sarbazdardyń aldynda áskerı ant qabyldaý, áskerı mamandyqty ıgerý jáne qoǵamdyq qaýipsizdik pen quqyqtyq tártipti qamtamasyz etý boıynsha qyzmettik-jaýyngerlik mindetter tur.
Buǵan deıin Ulttyq ulanda jeti tilde erkin sóıleıtin polıglot sarbaz áskerı mindetin atqaryp júrgenin jazdyq.
