Kókshetaýǵa juqpaly aýrýlardy emdeıtin aýrýhana salý kerek - J. Erǵalıev
ASTANA. 7 maýsym. QazAqparat - Aqmola oblysynyń ortalyǵynda juqpaly aýrýlardy emdeıtin aýrýhana jetkiliksiz.
Búgin QR Parlamenti Cenatynyń jalpy otyrysynda Úkimet basshysynyń atyna saýal joldaǵan depýtat Jabal Erǵalıev osy máseleni kóterdi.
Depýtattyń aıtýynsha, Aqmola oblysynyń ortalyǵynda juqpaly aýrýlardy emdeý isiniń materıaldyq-tehnıkalyq bazasy óte tómen. «Bir ǵana qalalyq aýrýhananyń juqpaly aýrýlar bólimshesinde jyl saıyn 550-600-ge jýyq túrli indet juqtyrǵandar emdelip shyǵady. 150 myńǵa jýyq halqy bar Kókshetaý qalasy men 800 myńǵa jýyq halqy bar tutas Aqmola oblysy úshin nebári juqpaly aýrýlardy emdeıtin 45 oryndyq aýrýhana ǵana bar. Jańaǵy 45 kereýet orynnyń 30-y balalar, al 15 orny eresekter bólimshelerinde ornalasqan», - deıdi senator. Onyń aıtýynsha, memlekettik sanıtarlyq jáne indet baqylaý organdarynyń anyqtaýlarynsha, aýrýlardy ornalastyrý, klınıkalyq-dıagnostıkalyq zertteýler júrgizý, tipti emdeý jaǵdaılary qanaǵatanǵysyz jaǵdaıda qalyp otyr. Óıtkeni, Kókshetaý qalalyq aýrýhanasynyń juqpaly aýrýlar bólimshesi oblystyq balalar aýrýhanasynyń juqpaly aýrýlar bólimshesimen birge ornalasqan. Bul jaǵdaı jáne óndiristik alańdar qurylys jáne sanıtarlyq-epıdemıologııalyq normalar men erejelerge múldem saı kelmeıdi.
«Túrli indet juqtyrǵandardy jedel oqshaýlap, olardy emdeýdiń sanıtarlyq indet normalary men tártibiniń saqtalmaýynan sol aýrýhana qyzmetkerleri men ózge de syrqattardyń túrli indetterdi birine biri juqtyrý qaýpi azaımaı otyr. Egerde álde bir juqpaly indet, tipti tumaýdyń ózi keńinen tarap keter bolsa, Kókshetaý qalasyndaǵy qazirgi aýrýhana indetke ushyraǵandardy tolyq oqshaýlaýǵa jáne dárigerlik kómek kórsetýge múldem qaýqarsyz bolar edi. Osyny eskerip, Kókshetaý qalalyq aýrýhanasy janynan 20-25 oryndyq osy zamanǵy úlgimen eresekterge arnalǵan juqpaly aýrýlar bólimshesin salý máselesi qarastyrylsa ıgi», - deıdi senator.
