Kókshetaýǵa medıtsınalyq bilim alý úshin úndistandyq stýdentter keldi
KÓKShETAÝ. QazAqparat - Kókshetaýǵa medıtsınalyq bilim alý úshin 27 adamnan turatyn úndistandyq stýdentterdiń aldyńǵy legi keldi, dep habarlaıdy QazAqparat tilshisi.
Shoqan Ýálıhanov atyndaǵy Kókshetaý memlekettik ýnıversıtetiniń baspasóz qyzmeti habarlaǵandaı, joba JOO men Úndistannyń «SunTrap 786 LIMITED» kompanııasy arasynda jasalǵan kelisimge sáıkes júzege asyrylyp otyr. Kelisim boıynsha kompanııa atalmysh bilim ordasyna 2023 jyldyń birinshi jartyjyldyǵyna deıin Úndistan, Pákistan, Shrı-Lanka, Nepal, Bangladesh sııaqty memleketterden talapkerler tartýy tıis. Jobanyń alǵashqy kezeńi boıynsha Kókshetaýǵa Úndistan elinen 50-ge jýyq stýdent kelýge tıis bolatyn. Jeltoqsan aıynyń alǵashqy kúnderi bul stýdentterdiń 27-i keldi. Olardyń 20-sy ul da, 7-ýi qyz.
«Ýnıversıtette sheteldik stýdentterge jańa ashylǵan medıtsına fakýltetinde oqý úshin barlyq jaǵdaı jasalǵan. Stýdentterdiń jastary ártúrli, 18-den 25-ke deıingi aralyqta. Medıtsına fakýltetinde sheteldik stýdenttermen jumys júrgizý úshin dekan orynbasarynyń laýazymyna arnaıy shtattyq birlik bólindi. Dál sondaı birlik bizdiń basqarmada da bar, óıtkeni biz júktelgen jaýapkershilikti sezinip, JOO ımıdjin saqtaý qajet ekenin túsinemiz. Biz vızadan bastap, turǵylyqty jerde tirkeý, tamaqtaný jáne qaýipsiz ómir súrý sııaqty barlyq uıymdastyrý jumystarymen aınalysamyz. Aıta ketetin jaıt, fırma stýdentterge Úndi aspazdyǵynyń taǵamdaryn daıyndaıtyn arnaıy aspaz da jaldady», dep túsindirdi QazAqparat tilshisiniń saýalyna Shoqan Ýálıhanov atyndaǵy Kókshetaý memlekettik ýnıversıtetiniń ınternatsıonaldandyrý jáne akademııalyq utqyrlyq basqarmasynyń jetekshisi Ekaterına Týrovskaıa.
Sheteldik stýdentter qonaqúı tárizdi etip jabdyqtalǵan jataqhanaǵa ornalastyryldy. Olar beıimdelý kezeńi men karantınnen ótkesin ǵana ýnıversıtetke oqýǵa barady. Olardy jataqhanadan ýnıversıtetke deıin jáne keri qaıtýǵa kúnine eki ret tasymaldaý uıymdastyrylyp otyrady. Tasymaldaý «Kókshetaý avtobýs parki» JShS-ne júktelip otyr.
«Ýnıversıtet sheteldik stýdentterdiń oqytý úderisine tyńǵylyqty daıyndaldy. Medıtsınalyq fakýltette sheteldik stýdentteri bar toptarda sabaq júrgizetin oqytýshylar qabyldandy. Dárister ázirlenip, úsh tilde 3D-tehnologııalary alyndy. Oqytý qarqyndy kýrstar túrinde júrgiziletin bolady», - dep tolyqtyrdy Ekaterına Týrovskaıa.
Aıta keteıik, búgingi tańda atalmysh ýnıversıtette úndiliktermen qatar Qytaı, Germanııa, Reseı, Mońǵolııa, Belarýs, Ázerbaıjan, Armenııa, Grýzııa, Ózbekstan jáne Tájikstan elderinen kelgen stýdentter de bilim alýda. Olardyń kóbi fılologııa jáne pedagogıka, S.Sádýaqasov atyndaǵy Agrarlyq-ekonomıkalyq ınstıtýtynda bilim alýda. Aldaǵy ýaqytta sheteldik stýdentter qatary áli tolyqtyrý josparda bar kórinedi.
