Kókshetaýǵa qar tústi

ASTANA.KAZINFORM — Kókshetaýdaǵy jyly aýa raıy kenet qarly boranǵa aýysty, dep habarlaıdy Kazinform tilshisi.

27 sáýir kúni aqmolalyqtarǵa 29 sáýirde ekpini 30 m/s bolatyn jeldiń kúsheıýi týraly eskertý jarııalanǵan.

Búgin Kókshetaýda qatty jel turyp, arty qar aralas jaýynǵa ulasty. Oblys ortalyǵyndaǵy keıbir mektepterde ata-analardyń qalaýy boıynsha balalaryn úıde qaldyrýǵa ruqsat berildi.

Kókshetaýda qatty jelden birneshe úı qırap, jabyndary qulap qaldy. Bul Saryarqa shaǵyn aýdany, 15/4, Ortalyq shaǵyn aýdany, 36/2.

Kókshetaýlyqtar aýlalaryndaǵy besedkalar men bannerlerdi jel julyp ketkenin aıtyp, shaǵymdandy.

«Qazgıdromet» RMK Aqmola fılıalynyń jetekshi sınoptıgi Larısa Goncharovanyń aıtýynsha, qazir Aqmola oblysynyń aýmaǵynda belsendi Soltústik-Batys tsıklony basym.

— Ol ózimen birge aýa temperatýrasynyń tómendeýin de ákeldi. Oblystyń soltústigi men batysynda qalyń qar túrindegi jaýyn-shashyn jaýady. Sonyń ishinde Kókshetaý qalasynda. Oblys aýmaǵynda ekpini 23-28, keı jerlerde 30 m/s-qa deıin jetetin daýyl soǵady, - dep habarlady Larısa Goncharova.

Sınoptıkterdiń boljaýynsha, túnde aýa temperatýrasy 0/+5 gradýsqa deıin tómendeýine jáne jaýyn-shashynnyń toqtaýyna ákeletin tsıklon aımaqtan shyǵyp, onyń ornyn sýyq antıtsıklon basady.

— Kúndiz 10-15 gradýsqa deıin jyly bolady. Mundaı aýa raıy aımaqta aldaǵy bir-eki kúnde saqtalady, dedi Larısa Goncharova.

Aıta keteıik, Kókshetaýda jylytý maýsymy 2025 jyldyń 24 sáýirinde aıaqtalǵan.