Kókshetaýǵa iri kólemde esirtki zatyn tasymaldaǵan kúdikti ustaldy
KÓKShETAÝ. QazAqparat – Aqmola oblysynda gashısh esirtki zatyn tasymaldaǵan Kókshetaý qalasynyń 44 jastaǵy turǵyny ustaldy, dep habarlaıdy QazAqparat tilshisi.
Aqmola oblystyq polıtsııa departamenti baspasóz qyzmetiniń málimetinshe, Esirtki qylmysyna qarsy is-qımyl basqarmasynyń qyzmetkerlerine oblys ortalyǵynyń turǵyny Kókshetaý qalasynyń aýmaǵynda esirtki zattaryn ótkizýmen aınalysatyny týraly habar túsken.
«Kúdikti «Qarasora-2022» respýblıkalyq jedel aldyn alý sharasy barysynda Kókshetaý qalasyna kireberis jolda qolǵa tústi. Oblys ortalyǵynyń 44 jastaǵy turǵynynyń avtokóligin tintý kezinde jolaýshylar otyratyn artqy oryndyqtan úsh polıetılen paketke oralǵan jalpy salmaǵy 2 keli 768 gramm gashısh esirtki zaty salynǵan sporttyq sómke tabyldy. Oǵan qosa elektrondyq tarazylar tárkilendi», - dedi departamentten.
Qazirgi ýaqytta polıtseıler esirtki zatyn satyp alý ornyn anyqtaý boıynsha is-sharalar júrgizip jatyr.
«Osy derek boıynsha Qylmystyq kodekstiń 296-babynyń 4-bóligi «Ótkizý maqsatynsyz esirtki zattarymen, psıhotroptyq zattarmen, olardyń analogterimen zańsyz jumys isteý» boıynsha sotqa deıingi tergeý bastaldy», - dep tolyqtyrdy baspasóz qyzmetinen.
Aıta ketsek, budan buryn Aqmolaǵa ońtústik óńirden marıhýananyń iri partııasyn jetkizýshi ustalǵan edi.
