Kókshetaýǵa 195 jyl: Polıpropılen qaptaryn shyǵaratyn kásiporyn iske qosyldy
KÓKShETAÝ. QazAqparat – Kókshetaýdyń 195 jyldyǵyna tartý retinde polıpropılen qaptaryn shyǵaratyn «Kokshe city» JShS-niń jańa óndiris tsehy iske qosyldy, dep habarlaıdy QazAqparat tilshisi.
«Asyl arman» jaýapkershiligi shekteýli seriktestiginiń janynan ashylǵan kásiporynda syıymdylyǵy 50-70 keli polıpropılen qaptary shyǵarylady.
Kásiporyn basshysy Rústem Ýsmanovtyń aıtýynsha, jańa tsehty ashý úshin 564 mıllıon teńge qarjy quıylǵan. Onyń 200 mıllıon teńgesin seriktestik óz qaltasynan salyp otyr. Barlyǵy 80 adamdy jumyspen qamtyp otyrǵan kásiporynnyń joba boıynsha qýaty 175 myń keli qap shyǵarýǵa jetedi. Bul qaptar Qazaqstannan basqa TMD elderi, Reseı jáne Qyrǵyzstanda úlken suranysqa ıe.
«Sońǵy jyldary elimizde shaǵyn jáne orta bıznesti, sondaı-aq, iri kásipkerlikti damytýǵa memleket tarapynan kóńil bólinýi bizdiń iskerlik belsendiligimizge úlken qoldaý bolyp, óndirisimizdiń ekonomıkalyq jaǵynan órkendeýine úlken úles qosyp otyr. Búgingi kúni kásiporynymyzda 80-ge jýyq biliktiligi joǵary mamandar jumys isteıdi. Fabrıka aıyna 175 myń kelige jýyq beriktiligi joǵary qaptar tigedi. Daıyn ónim negizinen elimizge, odan qaldy Qazaqstannan bólek, Reseı jáne Qyrǵyzstan elderine eksportqa shyǵarylady», deıdi Kásiporyn basshysy Rústem Ýsmanov.
Kásiporyn jumysymen tanysqan Aqmola oblysynyń ákimi Ermek Marjyqpaev ujymdy Kókshetaý qalasynyń 195 jyldyǵymen quttyqtap, eńbekterine jemis tiledi. Sondaı-aq, Aqmola oblysyndaǵy kásiporyndardyń eksporttyq áleýeti zor ekenin atap ótti. Ásirese, eksportpen aınalysatyn kásiporynnyń syrtqy saýdada jańa naryqqa shyǵýyna, kórshi jáne Eýrazııalyq ekonomıkalyq odaq elderimen saýda baılanystaryn nyǵaıtýǵa atsalysatyndyǵyn jetkizdi.
Aıta keteıik, alǵashynda «Novopek» keıin, «Asyl arman» bolyp ataýy ózgertilgen seriktestik Kókshetaýdaǵy irgeli kásiporyndardyń biri sanalady. Búgingi tańda kásiporynda polıetılen, polıpropılen jáne kaltsıı karbonatynan joǵary sapaly ári memlekettik jáne halyqaralyq standarttarǵa saı túrli qaptar men «Bıg-beg» konteınerleri shyǵarylady.
