Kókshetaýdyń ortalyq kóshesinde kólik janyp ketti

KÓKShETAÝ. QazAqparat – Kókshetaýdyń ortalyq kóshesinde jeńil kólik túgi qalmaı órtenip ketti. Áleýmettik jelide oqıǵa ornynan túsirilgen vıdeolar tarap jatyr, dep habarlaıdy QazAqparat tilshisi.

Vıdeo kadrlarynan jeńil kóliktiń qyzyl jalynǵa oranǵanyn, ony órt sóndirýshiler óshirýge tyrysyp jatqanyn kórýge bolady.

Aqmola oblystyq Tótenshe jaǵdaılar departamentiniń baspasóz qyzmetinen málim etkendeı, oqıǵa 2 tamyz kúni, saǵat 16:58 shamasynda Abaı kóshesiniń boıynda bolǵan.

«Tilsiz jaýdy aýyzdyqtaýǵa TJD jeke quramynan 7 adam jáne 1 órt sóndirý tehnıkasy tartyldy. Jalyn saǵat 17:04 aýyzdyqtalyp, 17:08 tolyq sóndirildi. Qaza bolǵandar men zardap shekkender joq. Órttiń shyǵý sebebi anyqtalyp jatyr», - dedi vedomstvodan.

Aıta ketsek, budan buryn Aqmola oblysynyń Birjan sal aýdanynda qurǵaq shóp órti sóndirilgenin jazǵan edik.