Kókshetaýdyń oblys ortalyǵy mártebesi alǵanyna 20 jyl toldy
KÓKShETAÝ. QazAqparat - Kókshetaýdyń Aqmola oblys ortalyǵy mártebesin alýy jáne onda Abylaı hanǵa eskertkish ornatylýy elimizdiń bolashaǵy úshin jasalǵan mańyzdy isterdiń biri boldy. Bul týraly osy tarıhı oqıǵanyń basy-qasynda júrgen, búgingi tańda Kókshetaý qalasynyń qurmetti azamaty ári medıtsına salasynyń ardageri Bolat Janádilov QazAqparat tilshisine áńgimelep berdi.
Osydan týra 20 jyl buryn, ıaǵnı 1999 jylǵy 8 sáýirdegi QR Tuńǵysh Prezıdenti- Elbasy Nursultan Nazarbaevtyń oblys ortalyǵyn Kókshetaý qalasyna kóshirý týraly Jarlyǵy Aqmola oblysynyń ómirinde saıası jáne áleýmettik ekonomıkalyq damýynyń mańyzdy kezeńi boldy. Osy Jarlyqqa sáıkes Aqmola oblysynyń ortalyǵy Nur-Sultan qalasynan (sol kezdegi Astana- avt.) Kókshetaýǵa kóshirildi.
«Tarıhtyń aqtańdaqtary bolǵan bul kezeńder táýelsizdiktiń tańy atqanda ǵana óziniń laıyqty baǵasyna ıe boldy. Ǵasyr sońynda qol jetkizgen Táýelsizdiktiń aıshyqty kezeńderi, úsh júzdiń basyn qosqan Abylaı han men Sáken, Aqan seri, Birjan sal jáne Úkili Ybyraı sııaqty jyr dúldilderi saf aýasyn jutyp, sýyn ishken Kókshetaýdyń Aqmola oblysy ortalyǵy saıası mártebe alýy aqmolalyqtardyń kóptegen kútken armany halqymyzdyń Uly tulǵasy Abylaı hanǵa eskertkish ornatylýymen aıshyqtala tústi», - deıdi Bolat Janádilov.
Kókshetaýdyń astana janyndaǵy oblys ortalyǵy mártebesin alýy onyń jańa baǵytta damýyna jol ashty. Aqmolaǵa qatysty aıshyqty oqıǵalardyń biri Prezıdentimizdiń 1999 jyly qarashada Kókshetaýda Abylaı hannyń eskertkishin saltanatty jaǵdaıda ashýy edi.
«Eskertkishtiń ashylý saltanatyna qatysqan Elbasy: Biz búgin bar qazaqtyń úsh júziniń basyn qosyp, táýelsizdigimizdi saqtap qalǵan uly qolbasshy ári hany Abylaı hannyń eskertkishin ashyp otyrmyz. Bunyń bári táýelsizdigimiz ben egemendigimizdiń arqasy dep degen edi... Men Prezıdent saılaýynda Elbasynyń senimdi ókilderiniń biri bolǵanymdy áli kúnge deıin maqtan etemin. Ol árdaıym ár óńirdiń hal-jaǵdaıyn surastyryp, turǵyndardy tolǵandyrǵan máseleler jaıly áńgime qozǵaıtyn. Sonda ylǵı: «Men senderdi óńirge barǵan sátte taýyp alamyn!», - dep aıtyp otyrýshy edi», - deıdi ol.
Shynymen de, 1999 jyly Aqmola oblysynyń ortalyǵyn Kókshetaý qalasyna kóshirý tarıhı oqıǵa boldy. Elbasy Aqmolanyń jańa oblys ortalyǵyna ózi kelip, Abylaı han eskertkishin ashyp berdi. Sol saparynda ózi aıtqandaı, Elbasy meni izdetip, shaqyrtyp aldy. Bul onyń aıtqan sózinde turatyn, sondaı-aq, ár sózine berik adam ekenin ańǵartady», -deıdi Bolat Janádilov.
Bolat Janádilov Elbasy saıasatynyń durys ekendigin jáne onyń búginde óziniń jemisin berip otyrǵandyǵyn atap aıtty.
«Keıin 2012 jyly Kókshetaýǵa kelgen sátinde Elbasy «Abylaı hannyń armanyn oryndadym. Qala saldym. Halyq beıbit ómir súrip jatyr», - dep aıtqan bolatyn. Bul sózdiń astarynan úlken parasattylyq seziledi. Ár kezdesý kezinde Elbasynyń kishipeıil, adamgershilik jáne izgilik qasıetine kýá boldym. Ol ózin sarabdal saıasatshy, tabandy kóshbasshy, tuǵyrly tulǵa ekenin álemdik deńgeıde dáleldep keledi», - dep túıindedi Bolat Janádilov.
