Kókshetaýdyń karantınge jabylatyny týraly aqparat jalǵan bolyp shyqty
KÓKShETAÝ. QazAqparat - Aqmola oblysynyń ortalyǵy — Kókshetaý qalasynyń karantınge jabylatyny týraly aqparat jalǵan bolyp shyqty, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, bul koronavırýs ınfektsııasyna qatysty WhatsApp qoldanýshylary taratqan úshinshi oqıǵa.
«25 naýryzda polıtsııa qyzmetkerleri WhatsApp messendjerine monıtorıng júrgizý kezinde koronavırýs ınfektsııasyn juqtyrǵan adamdardyń Kókshetaý qalasyndaǵy emdeý mekemelerinde ornalastyrylǵandyǵy jáne naýryzdyń 26-nan bastap oblys ortalyǵynyń karantınge jabylatyny týraly jalǵan aqparattardy anyqtady. Aýdıohabarlama avtory Kókshetaý tolyq qorshalatyndyqtan Krasnoıar aýylynyń turǵyndary qalaǵa kire almaıtynyn aıtqan», - deıdi vedomstvodan.
Osyǵan deıin habarlaǵanymyzdaı, polıtsııa qyzmetkerleri jalǵan aqparatty taratqandardy birer saǵattyń ishinde anyqtady.
«Aýdıojazba arqyly taratylǵan feık aqparattyń avtoryn anyqtaý boıynsha jedel izdestirý sharasy qolǵa alyndy. Nátıjesinde Kókshetaý qalasynyń 56 jastaǵy turǵyny ustaldy. Anyqtalǵandaı, áıel tanysynyń úıinde qonaqta bolǵanynda Ońtústik Koreıadan áýe reısimen ushyp kelgen qazaqstandyqtardyń Aqmola oblysyndaǵy emdeý mekemelerine ornastyrylǵandyǵyn estip, keıin ózge tanysyna aýdıojazba arqyly jibergen. Óz kezeginde tanys áıel aqparattyń ras-ótirigine kóz jetkizbesten 200-den astam qoldanýshy bar WhatsApp-taǵy topqa jibergen», - deıdi vedomstvodan.
Qazirgi kezde, osy oqıǵaǵa baılanysty úsh zań buzýshynyń ústinen QR Qylmystyq kodeksiniń 274-baby boıynsha (jalǵan aqparat taratý) sotqa deıingi tergeý amaldary júrgizilýde.
