Kókshetaýdyń alyp zaýyty ońtústik turǵyndaryn jumysqa shaqyrdy
ShYMKENT. QazAqparat - Kókshetaýdyń alyp zaýyty ońtústik turǵyndaryn jumysqa shaqyrdy. Polımerli qaptama shyǵaratyn kompanııa basshylyǵy búgin arnaıy baspasóz máslıhatyn ótkizip, ońtústikten 600-den asa jumysshy qabyldaıtynyn málimdedi, dep habarlaıdy «QazAqparat» HAA tilshisi.
Aǵymdaǵy jyldyń mamyr aıynda OQO ákimdigi tarapynan óńirdiń halqy tyǵyz ornalasqan aýdan, qalalarynan Aqmola oblysyna qonys aýdarý jóninde yntymaqtastyq týraly memorandýmǵa qol qoıylǵan bolatyn. Osy memorandým aıasynda "Novopek" kompanııasynyń basqarýshy dırektory Aıdar Jaqypov ońtústikke arnaıy kelip, aýdan-qalalarda kezdesýler ótkizýde.
Onyń sózinshe seriktestik keden odaǵynyń normalaryna sáıkes polıpropılen qaptary men jumsaq konteınerler shyǵaratyn zaýyttardyń biri sanalady. 2003 jyly qurylǵannan beri Novopek polımerli oraý sheshimderin ázirleýge, óndirýge jáne jetkizýge mamandanǵan. Qazirgi kezde aýdany shamamen 45 myń sharshy metrdi quraıtyn óndiristik keshende 600 adam jumys isteıdi. Búgingi kúni kompanııa basshysy Kókshetaý qalasyndaǵy zaýytta jumys istegisi keletin azamattar bolsa, olarǵa barlyq jaǵdaıdy jasaımyz dep sendirdi. Onyń sózinshe, qazir zaýytta jumys kúshiniń jetpeýi saldarynan kóptegen qondyrǵylar toqtap tur. Al eger qosymsha 600-den astam jumysshy kelse ónimdilikti eki esege deıin arttyryp, eýropa naryǵyna da shyǵýǵa múmkindik bar. ıAǵnı qazir aıyna 6 mln danadaı qap tigilse, onyń kólemi 11 mln-ǵa deıin artady.
«Zaýytqa negizinen úsh mamandyq boıynsha, mashınıster, operatorlar men tiginshiler qajet. Kelgen jumysshylardy aldymen arnaıy kýrstarda oqytyp, ol kezeńge 40 myń teńgeden stıpendııa beremiz. Odan keıin jumysqa qabyldanyp, jataqhanamen qamtylady. Jalaqylary 80-150 myń teńgeniń aralyǵynda. Qazirgi tańda zaýyttyń janynan turǵyn úı kesheni salynýda. Ol jerge 300-deı jumysshy qonystanatyn bolady. Sondyqtan biz jumysshylardy otbasylarymen kelse de qabyldaımyz. Aldaǵy ýaqytta olarǵa qala aýmaǵynan úı salýǵa jer bólý máselesi de qaralyp jatyr», - dedi Aıdar Jaqypov.
Tórt kúndik sapar barysynda zaýyt basshylyǵy Túrkistan qalasy men Saıram, Saryaǵash aýdanynyń turǵyndarymen kezdesedi dep kútilýde.
