Kókshetaýdyń 195 jyldyq mereıtoıyna bilim oshaǵy tartý etildi
KÓKShETAÝ. QazAqparat - Kókshetaýda qalanyń 195 jyldyq mereıtoıyna tartý retinde 280 oryndyq jańa balabaqsha paıdalanýǵa berildi, dep habarlaıdy QazAqparat tilshisi.
Jańadan salynǵan №20-shy «Zerek» balabaqshasynyń paıdalanýǵa berilýine baılanysty uıymdastyrylǵan ashyq esik kúnine aımaq basshysy Ermek Marjyqpaev pen qala turǵyndary qatysty.
Jınalǵandar aldynda quttyqtaý sóz sóılegen Ermek Marjyqpaev bul jaqsylyqtyń «Balapan» memlekettik baǵdarlamalar sharapatynyń arqasynda ekendigin aıta kele, aldaǵy oqý jyly osynda baratyn búldirshinder men olardyń ata-analaryn qýanyshtarymen quttyqtady.
Jınalǵan qaýym ishke enip, búldirshinderdiń jatqa oqyǵan óleńderi men ásem ánderine qulaq túrdi. Óz kezeginde ata-analar da oblys basshylyǵynyń atyna osynaý qamqorlyqtary úshin sheksiz rızashylyq sezimin bildirdi.
Balabaqsha meńgerýshisi Baný Núpilovanyń aıtýynsha, 280 orynǵa shaqtalǵan mektepke deıingi bilim berý mekemesinde 12 top qarastyrylǵan. Munda búldirshinderdiń ıntellektýaldyq damýyna barlyq jaǵdaı jasalǵan. Balabaqsha aqparattyq-kommýnıkatsııalyq tehnologııasy, densaýlyqtyq qorǵaý jáne saýyqtyrý tehnologııasy, úshtildi, balalardyń ǵylymı-eksperımentaldy jumysy, qosymsha bilim (beıneleý óneri, horeografııa) sııaqty bes baǵytta jumys isteıdi. Zamanaýı kabınetter, kórkem ádistemeler, tósek-oryndar men ashana. Bulardyń barlyǵy balalardyń jan-jaqty qalyptasýlary úshin arnaıy eseptelgen.
«Búgingi kúni elimizde balalardyń sapaly tálim-tárbıe alýy úshin barlyq jaǵdaı jasalýda. Osy baǵytta elimizdiń ár óńirinde balbaqshalar men mektepter kóptep salynýda. Ásem qalamyz Kókshetaýdyń 195 jyldyq mereıtoıyn merekeleý sheńberinde búgingi esigin aıqara ashyp otyrǵan balabaqsha sonyń bir aıǵaǵy ispettes», deıdi balabaqsha meńgerýshisi Baný Núpilova.
