Kókshetaýdyń 195-jyldyǵynda álemniń eki birdeı rekordy ornatyldy
KÓKShETAÝ. QazAqparat - Kókshetaýdyń 195-jyldyǵynda álemniń eki birdeı rekordty ornatyldy. Bul resmı túrde Gınnestiń álemdik rekordtar kitabynda tirkeldi, dep habarlaıdy QazAqparat tilshisi.
Krasnoıar kentindegi «Qulager» atshabarynda Kókshetaý qalasynyń 195-jyldyǵyna arnalǵan quraq kórpe tigýden «Quraq kórpe Fest» festıvali ótti. Oǵan qala turǵyndary, úkimettik emes uıymdardyń, memlekettik mekemeler men kásiporyndardyń qyzmetkerleri qatysty.
Festıval barysynda eki birdeı rekord ornatyldy. Onyń biri, quraq kórpeden jasalǵan 33 metr sheńber bolsa, ekinshisi uzyndyǵy 11120 metr quraq kórpe Gınnestiń rekorttar kitabyna engizildi.
Sharaǵa Gınnestiń álemdik rekordtaryn uıymdastyrýdaǵy resmı tóreshi máskeýden kelgen Vlad Kabýlov qatysyp, arnaıy sertıfıkattardy aımaq basshysy Ermek Marjyqpaevqa tapsyrdy.
Qazaqstan halqy Aqmola assambleıasynyń janyndaǵy Analar keńesiniń tóraıymy Zere Qıyqovanyń aıtýynsha, quraq kórpeni jasaýǵa 2 aı ýaqyt ketken.
«Kókshe óńiri aqyndyq, ánshilik ónerimen ǵana tanymal emes, qol ónerimen de áıgili. Óńirde on saýsaǵynan óner tamǵan Úkijan Ementaeva sııaqty qólónerdiń has sheberleri bar. Osyndaı sheberlerimizdiń arqasynda súıikti Kókshetaý qalamyzdyń 195 jyldyǵyna erekshe tartý jasap otyrmyz», dep atap ótti Zere Qıyqova.
