Kókshetaýdyń 195 jyldyǵyna oraı kópbalaly analar marapattaldy
KÓKShETAÝ. QazAqparat – Kókshetaý qalasynyń 195 jyldyǵy kúni bir top aqmolalyq kópbalaly ana «Altyn alqa» jáne «Kúmis alqa» tósbelgilerimen marapattaldy, dep habarlaıdy QazAqparat tilshisi.
Aqmola oblysy ortalyǵynyń 195 jyldyǵyna arnalǵan «Arqanyń kerbez sulý Kókshetaýy» atty saltanatty shara ótti. «Kókshetaý» mádenıet saraıynda uıymdastyrylǵan sharaǵa aımaq basshysy Ermek Marjyqpaev qatysyp, quttyqtaý sóz sóıledi.
«Kókshetaý erteden elimizdiń tarıhı, rýhanı mekenderiniń biri. Kóptegen qoǵam qaıratkerleriniń ómiri Kókshetaýmen baılanysty. Bizdiń qala – tek osy qalanyń tarıhynda ǵana emes, respýblıkanyń tarıhyna izin qaldyrǵan talanttar men eńbekqor adamdardyń Otany. Solardyń qatarynda Shoqan Ýálıhanov, Aqan seri, Birjan sal, Naýan Hazret, Maǵjan Jumabaev, Málik Ǵabdýllın sııaqty kóptegen tulǵalar bar. Qalanyń basty qundylyǵy, ol onyń turǵyndary. Búgingi tańda qalamyz qarqyndy damý ústinde, kún saıyn kórkeıip kele jatyr. Qala turǵyndary demalyp, jasyl alleıalar men ádemi gúlzarlardy tamashalaı alatyn alańdar, saıabaqtar men skverler kórkeıdi. Qala turǵyndary men qonaqtaryna arnalǵan jańa demalys oryndary ashyldy. Sońǵy eki jylda biz Temirjolshylar, Jastar alleıalaryn, Sádýaqasov kóshesi boıyndaǵy alleıany, tamashalaý alańyn, Stýdentter saıabaǵyn, Stantsıonnyı kentindegi saıabaq aımaǵyn ashtyq.
Dál kókshetaýlyqtar ǵana qajyrly eńbegimen qalamyzdy osy deńgeıge kóterip, týǵan ólkede turaqtylyq pen ıgilikti qamtamasyz etip otyr. Bul zalda qurylysshylar, dárigerler, muǵalimder, kásipkerler men basqa da kásiptiń ıeleri bar. Olardyń bári Kókshetaýdyń gúldenýine óz úlesin qosyp júr. Osy týǵan jerge degen súıispenshilik bizdi biriktiredi. Búgingi mereıli mereke kúni Kókshetaý qalasyn damytýdaǵy Sizderdiń eńbekterińiz ben baǵa jetpes kómekterińiz, týǵan qalamyzǵa degen shynaıy mahabbattaryńyz úshin alǵysymdy bildiremin», dedi qala ákimi E.Marjyqpaev.
Aımaq basshysy atap ótkendeı, sońǵy 5 jylda oblys ekonomıkasynda ónerkásip sektorynda ınvestıtsııa jáne eńbekaqy kólemi tórt esege ósken. Osy jyldary baspana berý kórsetkishi 1,6 esege (2014 jyly 105,9 myń sharshy metrden 2018 jyly 164,5 myń sharshy metrge) artty. Barlyǵy 8 myńǵa jýyq jańa jumys orny ashyldy. Bıylǵy jyl basynan beri bul kórsetkish 1000 qurady.
Saltanatty shara barysynda aımaq basshysynyń qolynan 7 bala tárbıelep otyrǵan Orazqan Ájiqan «Altyn alqa», 6 balanyń anasy Sáýle Aqybaeva men Aısulý Bımendına «Kúmis alqa» tósbelgisin aldy.
Budan bólek, qalanyń áleýmettik-ekonomıkalyq damýyna úles qosqan oblys ortalyǵynyń 6 turǵyny «Kókshetaý qalasynyń qurmetti azamaty» ataǵyna ıe boldy.
Sonymen qatar, bir top adam Aqmola oblysynyń ákimi Ermek Marjyqpaev jáne Kókshetaý qalasynyń ákimi Amangeldi Smaıylovtyń Alǵys hattarymen marapattaldy.
Merekelik shara jergilikti kórkemónerpazdardyń kontserttik baǵdarlamasyna ulasty.
