Kókshetaýdy sý basý qaýpi joq - Aqmola oblystyq TJD
NUR-SULTAN. QazAqparat - Aqmola oblysy boıynsha Tótenshe jaǵdaılar departamenti Kókshetaý qalasyn sý basý qaýpi joq ekenin habarlaıdy. Bul málimetti Feısbýktegi paraqshasynda Aqmola oblysy ákiminiń orynbasary Marat Iǵalı bólisti, dep habarlaıdy QazAqparat tilshisi.
«2019 jyldyń 31 naýryzy saǵat 18:00-degi jaǵdaı boıynsha aqparatpen bólise keteıin. Aqmola oblysy boıynsha Tótenshe jaǵdaılar departamenti Kókshetaý qalasyn sý basý qaýpi joq ekenin, táýlik boıy jedel shtab Aqmola oblysyndaǵy sý tasqyny jaǵdaıyna taldaý júrgizip otyrǵanyn habarlaıdy», - dep jazdy Marat Igalı.
Onyń jazýynsha, taldaý jumystaryna sáıkes, Ivanov toǵanyna kelip jatqan sý kólemi 10 santımetrge tómendegen. Kókshetaý qalasyndaǵy Qylshaqty ózeniniń salasynda sý deńgeıi 80 santımetrge azaıǵan.
«Kenesary jáne Ivanov toǵandaryn jáne Kókshetaý qalasyndaǵy Qylshaqty ózeniniń salasyn baqylap otyratyn beketter qoıyldy. Jaǵdaıdy turaqtandyrý úshin 258 adam men 20 arnaıy tehnıka jumyldyrylyp otyr», - deıdi Marat Iǵalı.
Eske sala ketsek, búgin tańerteń Aqmola oblysynyń Býrabaı aýdanynda aǵyn sý Kenesary sý qoımasyn buzyp ketken bolatyn. Oblystyq Tótenshe jaǵdaılar departamenti basshysynyń orynbasary Manarbek Shapaǵatovtyń aıtýynsha, tótenshe jaǵdaı naýryzdyń 31-inde tańǵy saǵat 04:25 shamasynda bolǵan. Erigen qar sýy men jańbyrdan Kenesary sý qoımasyndaǵy sýdyń deńgeıi kóterilgen. Osynyń saldarynan sý bógettiń (uzyndyǵy 30 metr, bıiktigi 4 metr) aýmaǵyn buzyp ketken.
