Kókshetaýdan bastaý alǵan «Shahmat kerýeni» 14 myń shaqyrymdy eńsermek
Petropavlda shahmat merekesi ótti. Soltústik Qazaqstan oblysynyń ortalyǵyna Kókshetaýdan bastaý alǵan «Shahmat kerýeni» jetti, dep habarlaıdy QazAqparat tilshisi.
Soltústik Qazaqstan oblysy - 13 qyrkúıek kúni Kókshetaýda bastalǵan estafetany qabyldap alǵan ekinshi óńir.
«Shahmat kerýenin» uıymdastyrýdaǵy basty maqsat – ıntellektýaldy oıynǵa kóńil aýdaryp, damytý.
Іs-shara barysynda oblystyq shahmat federatsııasynyń tusaýy da kesilip, onyń tóraǵasy bolyp oblys ákiminiń orynbasary Rústem Qurmanov saılandy.
«Shahmat – bizdiń aımaqtaǵy óte tanymal sport túri. Sebebi 5 myńǵa jýyq oblys turǵyny shahmat oınaıdy. Onyń 3,5 myńy – aýyl turǵyny. Qalada ǵana emes, aýylda da keńinen taralǵan bul sportqa endi jańadan serpin bermekpiz», – deıdi Rústem Qurmanov.
«Shahmat kerýeniniń» kelýine oraı ortalyq alańda kontserttik baǵdarlama uıymdastyryldy. Kıiz úı tigilip, blıts-shahmattan týrnır ótti. 20 oıynshy baǵy men babyn synǵa saldy.
Al úsh jeńimpaz 10 qarasha kúni Túrkistan qalasynda ótetin kezdesýde oblys namysyn qorǵaıdy.
Solardyń biri - Aleksandr Vıýnıchenko. Bas júldege 5 mln teńgeniń syıy tigilip otyr.
«Petropavlǵa «Shahmat kerýeniniń» kelýi – jaqsy jańalyq. Buǵan deıin sporttyń bul túrine osynsha jaǵdaı jasalǵan joq dep oılaımyn. Demeýshilerge alǵysym zor. Túrkistanda kil myqtylar kezdesedi. Namysty qoldan bermeýge tyrysamyz», - deıdi ol.
Budan keıin kerýen Qostanaıdy betke alady. 30 adamnan quralǵan top 10 qarashaǵa deıin elimizdiń barlyq óńirlerin aralap, 14 myń shaqyrymdy eńsermek.
