Kókshetaýdaǵy juqpaly aýrýlar aýrýhanasynan alǵashqy naýqas jazylyp shyqty
KÓKShETAÝ. QazAqparat - Kókshetaýda jańadan ashylǵan Aqmola oblystyq juqpaly aýrýlar aýrýhanasynan koronavırýs ınfektsııasymen aýyrǵan alǵashqy naýqas jazylyp shyqty, dep habarlaıdy QazAqparat tilshisi oblystyq ishki saıasat basqarmasyna silteme jasap.
Qarasha aıynyń basynda naýqas qyzdan koronavırýs belgisi baıqalǵan, keıin PTR-test nátıjesi boıynsha ol rastalǵan. Ol birden Kókshetaý qalalyq kópbeıindi aýrýhanasyna jatqyzyldy. Artynsha, Kókshetaýda jańadan ashylǵan oblystyq juqpaly aýrýlar aýrýhanasyna aýystyrylady.
«Aýrý jeńil túrde ótti. Ózimdi jaısyz seziný degen bolǵan joq. Dárigerler men personaldarǵa eńbekteri úshin alǵys aıtqym keledi. Olar óz isteriniń kásibı sheberleri. Aýrýhanada naýqastardyń emdelýi úshin barlyq jaǵdaı jasalǵan. Qazir kóńil-kúıim jaqsy», - deıdi Aınara.
Kókshetaý qalalyq kópbeıindi aýrýhanasynyń bas dárigeri Narıman Syzdyqovtyń aıtýynsha, búgingi tańda ortalyqta júkti 8 áıel emdelip jatyr. Táýlik boıy 25 medıtsınalyq qyzmetker jumys isteıdi. Naýqastardyń sany artqan saıyn medıtsınalyq personaldardyń da sany artady. Kókshetaýdaǵy modýldi juqpaly aýrýlar ortalyǵy 200 naýqasqa arnalǵan. Ortalyq «Jumyspen qamtýdyń jol kartasy» baǵdarlamasy boıynsha eki aıdyń ishinde salynyp, qarasha aıynyń basynda ashyldy. Munda juqpaly aýrýmen naýqastanǵandar emdeledi.
Jýyrda ǵana Kókshetaýda 200 oryndyq juqpaly aýrýlar aýrýhanasynyń ashylǵandyǵy týraly jazǵan bolatynbyz.
