Kókshetaýdaǵy joǵary kolledjde birinshi IT-ortalyq ashyldy
KÓKShETAÝ. QazAqparat - Kókshetaýdaǵy Aqmola oblysynyń bilim basqarmasy janyndaǵy joǵary kolledjde «Nur Otan» partııasynyń bastamashyl jobasyn júzege asyrý sheńberinde birinshi IT-ortalyq ashyldy, dep habarlaıdy QazAqparat tilshisi.
IT-ortalyqta qazirgi naryq zamanynda jumys isteıtin zamanýı ІT-sheshimderdi jedel qoldanyp, ıgere alatyn, halyqtyń ómir súrý sapasyn jaqsartatyn tsıfrlyq ónimderdi jasaıtyn jas mamandar daıarlanady.
Ortalyqtyń ashylýy rásimine Aqmola oblysy ákiminiń orynbasary Aına Mysyrálimova, «Nur Otan» partııasy Aqmola oblystyq fılıalynyń ókilderi, oblystyq bilim basqarmasynyń basshylary, joǵary kolledj ustazdary men oqýshylary jáne qaladaǵy 7-9 synyp oqýshylary qatysty.
Ortalyq jastardyń ınnovatsııalyq shyǵarmashylyq ortalyǵy negizinde qurylyp otyr. IT-ortalyqta mamandar modýldar, ıaǵnı, ınjenerlik keste jáne 3D tehnologııa, logıstıkalyq kontrollerlerdi, mehatrondy jáne robottandyrylǵan júıeni baǵdarlamalaý, web-saıttar men ınternet qosymshalardy jasaý boıynsha daıarlanady.
Qazirdiń ózinde atalmysh kolledj stýdentteri men túlekteri mobıldi qosymsha, saıttar, tsıfrlyq tehnologııa salasynda kásipkerlik tárizdi 25 start-ap jobanyń tusaýyn kesti.
Oǵan joǵary kolledj stýdentteriniń respýblıkalyq jáne óńirlik túrli baıqaýlarda top jarǵany aıqyn dálel. Onyń ishinde Janat Ǵabdýllın jáne Dmıtrıı Kolondarov WorldSkills Kazakhstan 2018 ulttyq chempıonatyna qatysyp, «Mobıldi robottehnıka» atalymy boıynsha saıysady.
«Biz bul jarysta bizdiń kolledjdiń abyroıyn qorǵaıtyn bolamyz. Jeńiske jetip jatsaq halyqaralyq jarysqa baramyz», deıdi oqýshylar.
IT-ortalyq ardýıno, MYRIO, LEGO protsessorlaryndaǵy tetrıs, joǵary minezdemesi bar monoblok, akýstıkalyq júıe, LCD paneli tárizdi qazirgi zamańǵy mobıldi robot tehnıkasymen jabdyqtalǵan.
