Kókshetaýdaǵy JEO qurylysy qashan bastalady
Mınıstrdiń aıtýynsha, Aqmola oblysyn jylýmen jabdyqtaýdyń negizgi kózderi Stepnogordegi JEO jáne «Kókshetaý jylý» kommýnaldyq kásipornynyń qazandyqtary bolyp otyr. Olardyń belgilengen jıyntyq qýaty saǵatyna 1,6 myń Gkal, al qoldanystaǵy qýaty saǵatyna 1,1 myń Gkal-dy quraıdy. Stepnogor JEO-nyń ortasha tozýy 76 paıyzdy, al «Kókshetaý jylý» kommýnaldyq kásipornynyń qazandyq jabdyǵy 63,1 paıyzdy quraıdy.
«Búgingi tańda qalada turǵyn úı qurylysy qarqyndy júrgizilýde, kóp qabatty turǵyn úıler, kásiporyndar men áleýmettik sala nysandary salynýda. Osyǵan baılanysty Kókshetaýda jylýmen qamtamasyz etý kózi máselesi týyndap otyr. Jumys istep turǵan jylý qazandyqtarynyń qýaty jetkiliksiz. Ol úshin búgingi kúni jylý qýaty saǵatyna 520 Gkal-dy quraıtyn Kókshetaý JEO qurylysy qarastyrylýda», - deıdi mınıstr.
Osy rette, mınıstr Memleket basshysynyń jeke baqylaýynda turǵan Kókshetaý JEO qurylysy salý sııaqty mańyzdy máseleniń sheshimi nelikten uzaqqa sozylyp otyrǵanyn atap ótti.
«Bastapqyda biz jobalaǵan stantsııa gazben jumys isteıdi dep josparladyq. Ókinishke oraı, Kókshetaý qalasyna gaz qubyryn jetkizý aıaqtalmaýyna baılanysty, ıaǵnı, Nur-Sultan qalasynan «Saryarqa» gaz qubyryn jalǵastyrýdy aıyp otyrmyn, bul joba iske asyrylmady, sondyqtan jobalaýmen ýaqyt sozylyp ketti. Endi biz stantsııa bolashaqta gazǵa aýysa otyryp, kómirdi otyn retinde paıdalanýy kerek dep sheshtik. Qyrkúıek aıynda aýktsıon ótkiziledi. Aýktsıon ashyq bolady, oǵan stantsııa qurylysyn qolǵa alǵysy keletin qatysady. Eń tómengi tarıf jáne eń jaqsy sharttardy usynǵandar stantsııa tańdap alynady. Sodan keıin ǵana keıin JEO qurylysy boıynsha jumystar bastalady», - dep tolyqtyrdy Bolat Aqsholaqov.
Aıta ketsek, Aqmola jáne Soltústik Qazaqstan oblystaryn gazdandyrý úshin 2 nusqa pysyqtalýda.
