Kókshetaýdaǵy saýda úıinde bolǵan órttiń sebebi anyqtalýda
KÓKShETAÝ. QazAqparat - Kókshetaýdaǵy «Trıýmf» saýda úıin sharpyǵan órt syrtqy əserdiń saldarynan tutanǵany anyqtaldy, dep habarlaıdy QazAqparat tilshisi QR ІІM TJK baspasóz qyzmetine silteme jasap.
Vedomstvanyń deregi boıynsha órt - synaq zerthanasynda júrgizilgen saraptama qorytyndysy Kókshetaýdaǵy ortalyq bazar aýmaǵynda ornalasqan saýda úıinde bolǵan órttiń syrtqy əserdiń saldarynan tutanǵanyn anyqtady.
Naqtyraq aıtqanda sóndirilmegen temeki tuqyly, qasaqana órt qoıý sııaqty túrli boljamdar bar. Məselen, atalmysh saýda úıi men janynda ornalasqan kıoskiniń arasy temeki shegetin oryn bolǵan.
«Órttiń naqty sebebin óńirlik ІІD anyqtaıtyn bolady», dep túsindirdi vedomstvadan.
Eske sala keteıik, 20 mamyrda atalmysh nysan órtenip ketti. Jalyn 450 sharshy metr aýmaqty shardy. Oqys oqıǵadan eshkim zardap shekken joq. Tilsiz jaýdan ǵımaratta bolǵan 70 adam qaýipsiz jerge shyǵaryldy. Órttiń saldarynan ǵımarattyń tek syrtqy qaptamasy ǵana búlindi. Osy oqıǵaǵa baılanysty Aqmola oblysynyń polıtseıleri «Abaısyzda bireýdiń múlkine zııan keltirý jəne joıý» boıynsha is qozǵap, sotqa deıingi tergeý amaldaryn qolǵa aldy.
