Kókshetaýdaǵy «saqaldy» qurylysqa aınalǵan oqytý-tárbıeleý kesheni keler jyly paıdalanýǵa beriledi
KÓKShETAÝ. QazAqparat - Aqmola oblysynyń ákimi Ermek Marjyqpaev Kókshetaý qalasy boıynsha jumys sapary kezinde Krasnoıar baǵytyndaǵy tas joldyń boıyndaǵy jeke menshik sektorynyń turǵyndarymen kezdesti, dep habarlaıdy QazAqparat tilshisi ákimdiktiń baspasóz qyzmetine silteme jasap.
Qazan aıynda «Ashyq ákimdik» formatynda ashyq esik kúnin ótkizý kezinde óńir basshysy joldyń sapasy, kóshelerdi jaryqtandyrý, avtobýs qatynasy men basqa problemalyq máseleleri boıynsha shaǵymdanǵan osy okrýgtiń turǵyndaryn jeke qabyldaǵan bolatyn.
Qala ákimi Amangeldi Smaıylovqa aımaq basshysy úsh jyl ishinde oblys ortalyǵynyń kóshe-jol jelisin jóndeýge qarastyrylǵan qarjy sheńberinde joldardy jónge keltirip jańbyr sýyn aǵyzý arnalaryn ornatýdy tapsyrdy.
Oblys ákimi osyndaǵy oqytý-tárbıeleý kesheniniń qurylys alańyn aralap kórdi. 2016 jyly bastalǵan qurylys jobasyn pysyqtaý, irge tasyn qaıta qurý qajet bolǵandyqtan toqtap qalǵan. Merdiger obektini 2020 jylǵy 1 qyrkúıekte paıdalanýǵa beretinine sendirdi. Búgingi tańda ekinshi qabaty jabylyp, terezeleri ornatylýda. Tas qalaýshylar úshinshi qabatynyń qabyrǵalaryn kóterýde.
Ermek Marjyqpaev merdigerden sapasyna áser etkizbeı josparlanǵan merzimdi saqtaýdy talap etti. Nysandy josparlanǵan merziminde iske qosý jetispeıtin oqý oryndary jáne mektepke deıingi oryndary problemasyn sheshýge múmkindik beredi. Sonymen qatar, okrýgke shaǵyn aýdan mártebesin berý máselesi kóterildi.
«Biz, týra jaýap alǵanymyzǵa qýanyshtymyz», – dedi áńgimelesý barysynda aqsaqal Sársenbaı Serdalın.
Sol kúni óńir basshysy Qajymuqan atyndaǵy №3 oblystyq mamandandyrylǵan balalar men jasóspirimderdiń olımpıada rezervi mektebinde bolyp, onda jas sportshylarǵa jasalǵan jaǵdaılarmen tanysty. Mekteptiń tóbesin jóndeý, sondaı-aq, kópbeıindi sport alańynyń qurylysyn salý qajet eken.
«Kómektesemiz, biraq nátıjeler de bolýy kerek», – dedi oblys ákimi.
