Kókshetaýdaǵy órtti sóndirý úshin tikushaqpen 75 tonna sý shashyldy - TJM
25 qyrkúıek kúni Kókshetaý taýynda ósimdikterdiń janýyn sóndirý barysynda órttiń taralýynyń aldyn alý maqsatynda TJM «Qazavıaqutqarý» tikushaǵy jumyldyryldy. Tikushaq Býrabaı kentindegi Aınakólden sý tıep, órt oshaqtaryna áýeden 75 tonna sý aǵyzdy.
«Qazavıaqutqarýdyń tájirıbeli ushqyshtary órtti aýadan sóndirý kezinde barynsha tıimdi nátıjege qol jetkizý úshin otpen kúreste sheberlik pen eptilik tanytqanyn atap ótý qajet. S ý aǵyzý kezinde ushqyshtar quramy aǵyzý bıiktigin qatań baqylaýy tıis. Eger aǵyzý bıiktigi janý ornynan tym joǵary bolsa, onda sýdy shashý kezinde ol býǵa aınalyp, tıimdiligi tómendeıdi. Al tym tómen bıiktikti alǵan jaǵdaıda, ósimdikter men taldar sý tógetin qurylǵyǵa tıip ketip, kedergi týdyrýy múmkin. Sondyqtan ushý aldynda ushqyshtar quramy órt bolyp jatqan jerdi zertteıdi jáne otpen kúresýdiń tıimdiligin arttyrý úshin qajetti bıiktikti dál esepteıdi», - dep jazdy TJM-nan.
Sý aǵyzý qurylǵylary bar tikushaqty qoldana otyryp órtti sóndirý úshin uzyndyǵy 27 metr uzyn arqanda ilinip turǵan sý aǵyzý qurylǵysynyń shaıqalýyn boldyrmaý úshin ushqyshtar quramynan jaqsy ushý tehnıkasy talap etiledi. Sonymen qatar, taýly, oıly-qyrly jerlerde jeldiń áserinen sý aǵyzý qurylǵysy shaıqalyp, órt ornyna tógilý dáldigin tómendetýi múmkin. Sondyqtan Qazavıaqutqarýdyń ushqyshtar quramy áýe kemesin terbelýge jol bermeıtindeı, tipti jeldiń áserinen sýdyń órt oshaǵyna barynsha túsýin qamtamasyz etetindeı etip basqarady.
Foto : gov.kz
