Kókshetaýdaǵy orta mektepke Sáken Júnisovtiń esimi berildi
KÓKShETAÝ. QazAqparat - Kókshetaý qalasyndaǵy №18 qazaq orta mektebine osy óńirdiń týmasy qazaqtyń tanymal tulǵasy, jazýshy, dramatýrg Sáken Júnisovtiń esimi berildi, dep habarlaıdy QazAqparat tilshisi.
Kókshetaý qalasy ákiminiń bıylǵy jyldyń 24 shildesindegi qaýlysyna saı, №18 qazaq orta mektebi Sáken Júnisov atyndaǵy mektep-lıtseıi bolyp atanatyn boldy.
Jańa oqý jylynyń ashylý saltanatyna jınalǵan oqýshylar men ata-analardyń aldynda jazýshynyń qaryndasy Roza Júnisova sóz sóılep, aǵasynyń esiminiń mektepke berilýine úlken rızashylyǵyn aıtty jáne uly tulǵanyń atyndaǵy mekteptiń oqýshylaryna sabaqty jaqsy oqyp, bıikterden kórine berýlerine tilektestigin bildirdi. Sáken serimen úzeńgiles dos-jar bolǵan qalamger Tólegen Qajybaev jazýshyny eske alyp estelikterimen bólisti, Kókshe óńirinen shyǵyp, qazaq ádebıetin damytýǵa eleýli eleýli úles qosqan azamattyń esimin el esinde saqtaý úshin jasalǵan bul ıgi iske úlken rızashylyq tanytty.
Bul kúni mektep-lıtseıde alǵashqy qońyraý soǵylyp, uly tulǵanyń esimin alyp ataýy da, mektep-lıtseı atanyp mártebesi de ózgergen oqý ornynyń oqýshylary alǵashqy sabaqtaryna kiristi. Mektep dırektory Jaqsylyq Qýanulynyń aıtynsha, qazirgi kúni munda 1 600-deı bala oqıdy. Bıylǵy jyly 6 birinshi synypqa 150-deı oqýshy kelipti. Balalar sanynyń jyl sanap óse túsýine oraı, mektep ǵımaraty tarlyq etkendikten, qosalqy ǵımarat qurylysy bastalǵan. Qazir irgesi turǵyzylyp, shatyryn jabý jumystary júrgizilip jatyr.
Keler jyly qosymsha ǵımarat paıdalanýǵa beriledi. Sol kezde Sáken seriniń ómiri men shyǵarmashylyǵyna arnalǵan jeke murajaı-kabınet ashylady dep josparlanýda. Ázirge jazýshynyń shyǵarmashylyǵyna arnalǵan taqta mekteptiń kireberisinde orynatylǵan.
