Kókshetaýdaǵy órt: taýly jerde jalynmen kúresýdiń birqatar qıyndyǵy bar - TJM

ASTANA. QazAqparat – Tótenshe jaǵdaılar mınıstrliginiń baspasóz qyzmeti taýlardaǵy orman órtin sóndirýdiń mańyzdy erekshelikteri men birqatar qıyndyqtary bar ekenin jetkizdi, dep habarlaıdy QazAqparat.

«Taýlardaǵy orman órtterimen kúresý úshin jer qazý jáne topyraq óńdeý tehnıkasyn qoldaný shektelgen, al tasty topyraqtarda oǵan múldem jol berilmeıdi. Munda avtotsısternalar men órt sóndirý motopompalaryn paıdalaný da múmkin emes. Sondyqtan, qazirgi ýaqytta jeke quram órtti sóndirý úshin aspaly búrikkishterdi, sondaı-aq qol quraldaryn – kúrek, ketpen men tyrma qoldanady. Tutanýdyń kóldeneń betkeıden tik betkeıge aýysýy kezinde janý jyldamdyǵy da artýy múmkin, bul – órt sóndirýshiler úshin qaýipti.

«Qazavıaqutqarý» tikushaǵy da órtti sóndirýge kiristi. Qazirgi ýaqytta Aqmola oblysy TJD-nyń 158 qyzmetkeri jáne Býrabaı MUTP-nyń 70 qyzmetkeri órt sóndirýge tartylǵan», - delinedi baspasóz málimdemesinde.

Buǵan deıin habarlaǵanymyzdaı, búgin tańerteń jedel kezekshi pýltine «Býrabaı» MUTP aýmaǵyndaǵy «Kókshetaý» taýynda shamamen 800 metr bıiktikte tútinniń kóringeni týraly habarlama túsken. Órt sóndirýshiler oqıǵa ornyna jaıaý baryp, órtti sóndirýge kiristi.