Kókshetaýdaǵy ońaltý ortalyǵynan 3 jasóspirim qashyp ketti (FOTO)
KÓKShETAÝ. QazAqparat - Kókshetaýda polıtseıler ońaltý ortalyǵynan qashyp ketken jasóspirimderdi izdestirýde. Bul týraly oblystyq ІІD baspasóz qyzmetinen habarlady.
Polıtseılerdiń deregi boıynsha 27 maýsym kúni keshki ýaqyt 21:15 shamasynda Kókshetaý qalalyq ІІB JBO «Jasóspirimderdi ońaltý ortalyǵy» MM dırektorynyń orynbasary habarlasyp, sol kúni saǵat 18:00 ortalyq aýmaǵynda serýendep júrgen 2001 jylǵy Dıas Kákimov, 2001 jylǵy Vladımır Sobolevskıı jáne 2002 jylǵy Denıs Aspıleıderdiń belgisiz jaqqa ketip qalǵanyn aıtqan.
«Keıin belgili bolǵandaı Dıas Kákimov, Vladımır Sobolevskıı jasóspirimder isi boıynsha Aqmola oblystyq ıývenaldy sotynyń sheshimi zańdy kúshine engenshe ortalyqta ýaqytsha bolǵan. Al, Denıs Aspıleıderdiń anasy ata-ana quqynan aırylǵan, sol sebepti ol atalǵan sottyń sheshimine sáıkes balalar úıine jiberilgenshe ortalyqty panalaǵan.
Qazirgi kezde, Kókshetaý qalalyq ІІB ıývenaldy ınspektorlary men polıtseıleri joǵalǵan jasóspirimderdi izdestirýde. Olardyń júrgen jeri týraly aqparat bolsa, 25-96-00 nemese 102 arnaıy telefon nómirine habarlasýyna bolady», dep kórsetilgen habarlamada.
