Kókshetaýdaǵy ofıtserler akademııasynyń 300 oryndyq jataqhanasynda 450 kýrsant turyp jatyr

NUR-SULTAN. QazAqparat - Májilis depýtattarynyń aımaqtardaǵy sapary odan ári jalǵasýda. Depýtat Mádı Ahmetov Kókshetaý qalasyndaǵy órt sóndirýshiler men qutqarýshylardy daıarlaıtyn Málik Ǵabdýllın atyndaǵy Azamattyq qorǵaý akademııasyna bardy, dep habarlaıdy QazAqparat.

M.Ahmetovtyń aıtýynsha, búgingi tańda elimizde ǵana emes, jalpy Ortalyq Azııadaǵy azamattyq qorǵaý organdarynyń ofıtserlerin daıyndaıtyn akademııanyń materıaldyq-tehnıkalyq bazasy eskirgen, mysaly 570 kýrsantqa nebári 30 kompıýter ǵana bar.

– Elordaǵy mektepterdiń sport zaly akademııanyń sport keshenin eki orap alady, salystyrýǵa kelmeıdi. Soǵan qaramastan, amaldyń joqtyǵynan tar jerde kúndelikti jatyǵýlaryn júrgizýde, – deıdi depýtat.

Sonymen qatar M.Ahmetov akademııanyń jataqhanasy óz aldyna bólek másele ekenin aıtty.

– Qazir 300 adamǵa arnalǵan jataqhanada 450 kýrsant turyp jatyr. Al qalǵan 4-kýrs kýrsanttary qaladan páter jaldap turýǵa májbúr. Tozyǵy jetken ǵımarattyń terezelerinen jel gýildep tur. Kýrsanttarǵa dýsh qarastyrylmaǵan, tek apta sońynda monsha. Ómir men ólim arasynda júrip, tilsiz jaýmen, tabıǵı apat saldarymen kúresetin, birinshi bolyp kómekke keletin mamandardyń tıisti deńgeıde bilim alyp, qalyptasýyna jaǵdaı jasaýymyz qajet – dedi.

Sondaı-aq depýtat Tótenshe jaǵdaılar mınıstrligi atalǵan máseleler boıynsha tıisti sharalardy qabyldaýǵa tyrysyp jatqanyna toqtalyp, máseleni Úkimet aldynda kóteretinin aıtty.