Kókshetaýdaǵy MMA týrnırinde bolashaq chempıondar anyqtalatynyna úmittenemin- Anatolıı Kım

Onyń aıtýynsha, aǵymdaǵy jyldyń 3-5 qarasha kúnderi Kókshetaýda MMA aralas jekpe-jek boıynsha Qazaqstannyń ІІІ Kýbogyn uıymdastyrý kózdelgen. Atalǵan týrnırge elimizdiń ár óńirinen keletin 100-ge jýyq sportshy qatysyp, 7 salmaq boıynsha kúsh synasady.  
«Elimizde qurylǵanyna eki-úsh jyldyń júzi ǵana bolǵan sporttyń bul túri sońǵy kezderi tanymaldylyǵyn arttyryp keledi. Kókshetaýda ótetin jarys sonyń bir aıǵaǵy ispettes. Jyl saıyn ulttyq qurama sapy jańa sportshylarmen tolyǵýda. Onyń ishinde kásipqoılar arasynda esh jeńilip kórmegen Álem jáne Azııa chempıony Shavkat Rahmonovty erekshe atap ótýge bolady. Onyń jetistigi biz úshin úlken mártebe. Osy sport túrimen aınalysatyn jastar úshin úlgi, ónege. Kókshe jerinde ótetin jarysta elimizdiń bolashaq chempıondary men ulttyq qurama sapyna alynatyn jańa esimder anyqtalatyna úmittenemin», dedi Anatolıı Kım.
Sonymen qatar, Qazaqstan MMA Federatsııasynyń prezıdenti ulttyq quramanyń Álem jáne Azııa boıynsha  úzdikter qatarynda ekenin aıta kele, jastardy salaýatty ómir saltyn qalyptastyrýǵa jáne shymyrlyqqa úıretetin bul sport túrine sheneýnikter tarapynan qoldaý qajettigin atap ótti.
Baspasóz máslıhatyna qatysqan Aqmola oblysy MMA Federatsııasynyń prezıdenti Erlan Bótembaev, QR Eńbek sińgen jattyqtyrýshysy, MMA boıynsha QR ulttyq quramasynyń bas jattyqtyrýshysy Baıan Janǵalov jáne MMA boıynsha Álem jáne Azııa chempıony Shavkat Rahmonov bul jolǵy týrnır týraly ózderiniń pikirlerin bildirip, aldaǵy josparlarymen bólisti.
Eske sala keteıik,  3-5 qarasha kúnderi Kókshetaýdaǵy tennıs ortalyǵynda  MMA aralas jekpe-jek boıynsha Qazaqstannyń ІІІ Kýbogy ótedi. Oǵan elimizdiń ár óńirinen keletin 100-ge jýyq sportshy qatysyp, 7 salmaq boıynsha kúsh synasady.  Jarys shoý túrinde ótpek.