Kókshetaýdaǵy Qylshaqty ózeni tasydy: Sý sorý jumystary júrgizilýde
KÓKShETAÝ. QazAqparat - Kókshetaýda Qylshaqty ózeni arnasynan asyp, birqatar turǵyn úıler men aýlalardy sý basyp qaldy, dep habarlaıdy QazAqparat tilshisi.
Aqmola oblysynyń TJD bastyǵy Alekseı Sovetov jýrnalıstermen ótken brıfıngte atap ótkendeı, sý tasqynynan Vokzal mańy, MPS, №8 orta mektep mańyndaǵy turǵyn úıler men nysandar, turǵyn úı aýlalaryn sý basqan.
«Qaýipti aımaqta 600 turǵyn úı ornalasqan. Sońǵy málmetter boıynsha, 5 turǵyn úı men 15 aýlaǵa sý ketip, 16 adam qaýipsiz jerge kóshirildi. Búgin keshki saǵat saǵat 17:00 deıin sý sorý jumystaryn aıaqtaımyz», - deıdi A.Sovetov.
Departament basshysynyń málimeti boıynsha, sý tasqynyna qanshalyqty əzirlengenimen naýryzdyń 31-de jaýǵan qar men aýa raıynyń kúrt jylynýy biraz qıyndyqtar týǵyzýda.
«Qazirgi kezde sý tasqynyna qarsy jáne zalaldaryn joıý boıynsha barlyq kommýnaldyq qyzmetterdiń arnaıy tehnıkalary men TJD kúshi men quraldary tartylyp, təýlik boıy jumys isteýde. Onyń ishinde TJD jeke quramynan 8 adam jáne 3 arnaıy tehnıka, jergilikti atqarýshy organdardan 13 adam jáne 10 tehnıka, Kókshetaý qalalyq PB 8 adam jáne 3 tehnıka, 16 motopompa bar», deıdi A.Sovetov.
Eske sala ketsek, osyǵan deıin habarlaǵanymyzdaı naýryzdyń 31-de erigen qar sýy men jańbyrdan Aqmola oblysynyń Býrabaı aýdanynda aǵyn sý Kenesary sý qoımasyndaǵy sýdyń deńgeıi kóterilgen. Osynyń saldarynan sý bógettiń (uzyndyǵy 30 metr, bıiktigi 4 metr) aýmaǵyn buzyp ketken.
