Kókshetaýdaǵy bilim uıymdarynda múmkindigi shekteýli adamdarǵa qolaıly jaǵdaı jasalmaǵany anyqtaldy
Vedomstvonyń málimetinshe, QR Memlekettik qyzmet isteri agenttiginiń Aqmola oblysy boıynsha departamenti Kókshetaý qalasynyń bilim berý uıymdarynda kezekti qoǵamdyq monıtorıng ótkizdi. Monıtorıng barysynda birqatar zań buzýshylyq anyqtaldy.
«Mysaly, keıbir uıymdarda múmkindigi shekteýli tulǵalardyń avtokóligin qoıatyn arnaıy belgi joq, mamandardy shaqyrý batyrmalary jumys istemeıdi, sanıtarlyq toraptar arnaıy jabdyqpen qamtamasyz etilmegen, aqparattyq stendterde memlekettik qyzmet kórsetý tártibi týraly ózekti aqparat ornalastyrylmaǵan», - deıdi vedomstvodan.
Atalǵan kemshilikter departament janyndaǵy Memlekettik qyzmetter kórsetý máseleleri jónindegi vedomstvoaralyq jumys tobynyń otyrysynda qaraldy. Otyrys barysynda departament basshysynyń orynbasary Darhan Haırýllın «Memlekettik kórsetiletin qyzmetter týraly» zańyna sáıkes memlekettik qyzmet kórsetetin memlekettik organdar múmkindigi shekteýli adamdar úshin qolaıly jaǵdaılar jasaýy mindetti ekenin eske saldy.
Otyrys qorytyndysy boıynsha anyqtalǵan kemshilikti joıýǵa baǵyttalǵan tıisti usynymdar ázirlendi. Memlekettik qyzmetter basqarmasynyń bas mamany Qanat Aıtymov múgedekterge memlekettik qyzmetterdi alý kezinde qolaıly jaǵdaı jasaý, sondaı-aq oblys uıymdarynda zańnamany buzýǵa jol bermeý maqsatynda baqylaý is-sharalary turaqty negizde ótkiziletinin eskertti.
