Kókshetaýdaǵy adam ólimine sebep bolǵan jol apatyna qatysty eki qylmystyq is qozǵaldy
KÓKShETAÝ. KAZINFORM — Belgili bolǵandaı, er adam kólikti júrgizýshi kýáligi joq jubaıyna bergen. Saldarynan oblys ortalyǵyndaǵy aýlalardyń birinde áıel adam jaıaý júrginshini qaǵyp, ol oqıǵa ornynda kóz jumdy, dep habarlady Kazinform agenttiginiń óńirdegi menshikti tilshisi.
Aqmola oblystyq polıtsııa departamentiniń baspasóz qyzmetiniń málimetinshe, Kókshetaýda 52 jastaǵy áıeldiń ólimine ákelgen jol-kólik oqıǵasyna baılanysty eki qylmystyq is qozǵalǵan.
— Kólik júrgizgen áıelge qatysty adam ólimine ákelgen jol qozǵalysy erejeleri men kólik quraldaryn paıdalaný talaptaryn buzý faktisi boıynsha sotqa deıingi tergeý júrgizilýde. Tergeý barysynda áıeldiń kólik júrgizý quqyǵy bolmaǵany jáne tıisti oqýdan ótpegeni anyqtaldy, — dep habarlady vedomstvo.
Sonymen qatar kólik ıesi — onyń jubaıyna qatysty da júrgizýshi kýáligi joq adamdy kólik basqarýǵa jibergeni úshin qylmystyq is qozǵaldy. Bul bap boıynsha bas bostandyǵynan aıyrý jazasy qarastyrylǵan.
— Qazirgi ýaqytta jol-kólik oqıǵasyn jan-jaqty jáne obektıvti tergeýge baǵyttalǵan qajetti tergeý áreketteri júrgizilýde, — dep tolyqtyrdy vedomstvo.
11 mamyr kúni Kókshetaý qalasynyń mamandandyrylǵan tergeý soty kúdiktige qatysty «úıqamaq» túrindegi bultartpaý sharasyn sanktsııalady. Qylmystyq isterdiń tergelýi polıtsııa departamenti basshylyǵynyń baqylaýynda.
Eske salaıyq, buǵan deıin Kókshetaý qalasynyń Saryarqa shaǵyn aýdanyndaǵy aýlalardyń birinde adam ólimimen aıaqtalǵan jol-kólik oqıǵasy bolǵan edi.
