Kókshetaýdaǵy jol apaty: tergeý amaldary qashan aıaqtalady
ASTANA. KAZINFORM – QR Іshki ister mınıstriniń orynbasary Sanjar Ádilov Kókshetaýda adam ólimine sebep bolǵan jol apatyna qatysty tergeý amaldaryna túsinik berdi.
Onyń aıtýynsha, atalǵan derek boıynsha eki qylmystyq is qozǵaldy. Júrgizýshige qatysty QR Qylmystyq kodeksiniń 345-baby boıynsha bir is qozǵaldy. Sot úıqamaqqa alý týraly sheshim shyǵardy.
- Sonymen qatar kólikti basqarýdy zańsyz bergen adamǵa qatysty Qylmystyq kodektiń 349-baby boıynsha qosymsha qylmystyq is qozǵaldy. Avtotehnıkalyq saraptamany alǵannan keıin, bir aı ishinde tergeýdi aıaqtaýdy josparlap otyrmyz, - dedi S.Ádilov Parlament Májilisinde tilshiler suraǵyna jaýap bere otyryp.
Onyń sózine qaraǵanda, 349-bap boıynsha 5 jylǵa deıin bas bostandyǵynan aıyrý jazasy qarastyrylǵan.
Buǵan deıin habarlanǵandaı, jaqynda Kókshetaý qalasynyń Saryarqa shaǵyn aýdanyndaǵy aýlalardyń birinde adam ólimimen aıaqtalǵan jol-kólik oqıǵasy boldy.
Belgili bolǵandaı, er adam kólikti júrgizýshi kýáligi joq jubaıyna bergen. Saldarynan oblys ortalyǵyndaǵy aýlalardyń birinde áıel adam jaıaý júrginshini qaǵyp, ol oqıǵa ornynda kóz jumdy.
