Kókshetaýdaǵy jármeńkege oblystyń kásipkerleri 70 tonna ónim ákeldi
Kókshetaýda aýyl sharýashylyǵy ónimderiniń kezekti azyq-túlik jármeńkesi ótti, dep habarlaıdy QazAqparat tilshisi.
Oblys ortalyǵyndaǵy Táýelsizdik alańynda uıymdastyrylǵan jármeńkege Arshaly, Astrahan, Ereımentaý, Esil, Jaqsy, Jarqaıyń, Qorǵaljyn, Tselınograd aýdandary jáne Kókshetaý men Qosshy qalalarynyń aýyl sharýashylyǵy taýarlaryn óndirýshiler qatysty.
Jármekeńge barlyǵy 84 mıllıon teńgege 70 tonna ónim ákelindi. Onyń ishinde qala turǵyndary úshin jeńildetilgen baǵamen 30,8 tonna et jáne shujyq ónimderi, 1,2 tonna jańa balyq, 93 myń dana jumyrtqa, shamamen 4,7 tonna sút jáne sút ónimderi, 8 tonnadan astam un, 16 tonnadan astam kartop, shamamen 2 tonna kókónis jáne basqa da ónimder usynyldy.
Jármeńkeni aralap kórgen aımaq basshysy Marat Ahmetjanov azyq-túlik baǵasy men sapasyna nazar aýdardy.
- Bul jármeńke aýyl sharýashylyǵy taýarlaryn óndirýshiler úshin ónimderin satýǵa múmkindik berse, qala turǵyndaryna naryq baǵasynan 10-15 paıyzǵa tómen azyq-túlik satyp alýda tıimdi bolyp otyr. Satyp alýshylar arasynda aǵa býyn ókilderi kóp. Men óndirýshiler men turǵyndardyń pikirlerin tyńdadym, bolashaqta qarastyratyn usynystar bar, - dedi ákim.
Sondaı-aq, oblys basshysy mundaı is-sharalarǵa eriktilerdiń de qatysý qajettigin atap ótti.
Qorǵaljyn aýdanyndaǵy «Quralaı MK» jaýapkershiligi shekteýli seriktestiginiń ókili Saıat Sekerov et ónimderin ákelipti.
- Biz sıyr etin 2300 teńgeden sattyq, qala turǵyndary úshin bul óte tıimdi baǵa. Sol úshin, bizge kókshetaýlyqtar alǵystaryn aıtty, - dep bólisti kásipker.
Oblys ákimdiginiń málimetinshe, qazan aıynyń sońynda Aqmola oblysynyń óndirýshileri Astana qalasyndaǵy aýyl sharýashylyǵy jármeńkesine qatysady.
Aıta keteıik, budan buryn Aqmola oblysynda azyq-túlik baǵasynyń ósý sebepteri týraly jazǵan edik.
