Kókshetaýdaǵy zamanaýı aýrýhana soltústik makroóńirdiń densaýlyq salasyn kúsheıtedi
ASTANA. KAZINFORM — Kókshetaýdada 2024 jyldyń qazan aıynda bastalǵan 630 tósekke shaqtalǵan jańa kópbeıindi aýrýhananyń qurylysy jalǵasyp jatyr, dep habarlaıdy Densaýlyq saqtaý mınıstrliginiń baspasóz qyzmeti.
Vedomstvo málim etkendeı, joba elimizdiń densaýlyq saqtaý salasyndaǵy asa mańyzdy jáne júıeli ınfraqurylymdyq jobalardyń biri sanalady. Nysannyń qurylysy Prezıdent Qasym-Jomart Toqaevtyń tapsyrmasy boıynsha júzege asyrylady jáne Aqmola oblysy men búkil Soltústik makroóńir úshin strategııalyq mańyzy bar.
Osy jyldar ishinde óńirdegi statsıonarlyq medıtsınalyq kómek shashyrańqy jáne moraldyq turǵydan eskirgen ınfraqurylym jaǵdaıynda kórsetildi. Kókshetaýdaǵy jańa aýrýhana qalyptasqan jaǵdaıdy túbegeıli ózgertýge baǵyttalǵan. Joba qabyldaý-dıagnostıkalyq qyzmetterdi, shuǵyl medıtsınalyq kómekti, hırýrgııalyq jáne terapııalyq bólimshelerdi, reanımatsııa jáne qarqyndy terapııa bólimshelerin, sondaı-aq qalpyna keltirý emi jáne ońaltý qyzmetterin bir keńistikte biriktiretin biryńǵaı zamanaýı medıtsınalyq keshen retinde iske asyrylyp jatyr.
Jańa aýrýhanany paıdalanýǵa berý jergilikti jerde mamandandyrylǵan jáne joǵary tehnologııalyq medıtsınalyq kómek kórsetý múmkindikterin edáýir keńeıtýge, sondaı-aq patsıentterdiń basqa óńirlerge májbúrli joldamalaryn qysqartýǵa múmkindik beredi.
— Medıtsınalyq keshendi jaraqtandyrý qoldanystaǵy standarttarǵa sáıkes zamanaýı joǵary tehnologııalyq jabdyqtarmen júzege asyrylady. Joba mańyzdy kadrlyq mánge ıe. Zamanaýı, tehnologııalyq jumys ortasyn qurý — óńirde bilikti medıtsına mamandaryn tartý men bekitýdiń negizgi faktorlarynyń biri. Kókshetaýda 630 tósektik kópbeıindi aýrýhana salý — bul jańa nysan salý ǵana emes, elimizdiń densaýlyq saqtaý salasyn jańǵyrtý jónindegi júıeli memlekettik saıasattyń bir bóligi, — delingen vedomstvo habarlamasynda.
Budan buryn Qazaqstanda salaýatty ómir saltyn ustanatyn azamattar sany kóbeıip keletinin jazǵanbyz.