Kókshetaýdaǵy respýblıkalyq spartakıadaǵa myńnan astam memlekettik qyzmetshi qatysady
KÓKShETAÝ. KAZINFORM — 11-17 shilde aralyǵynda Aqmola oblysynda alǵash ret jergilikti atqarýshy organdardyń memlekettik qyzmetshileri arasynda ótetin respýblıkalyq spartakıada uıymdastyrylady. Oblys ortalyǵyna elimizdiń túkpir-túkpirinen 1 200-den astam qatysýshy jınalady. Aýqymdy sporttyq is-sharanyń basty alańy jańa kópfýnktsıonaldy Kokshe Arena sport kesheni bolady.
Óńirdiń osyndaı aýqymdy jarysty ótkizý úshin tańdalýy Aqmola oblysyndaǵy sport ınfraqurylymynyń qarqyndy damýymen baılanysty. Tek ótken jyldyń ózinde óńirde 13 jańa sport nysany paıdalanýǵa berildi. Spartakıadanyń negizgi alańy bolatyn zamanaýı Kokshe Arena kesheni halyqaralyq standarttarǵa tolyq saı keledi jáne eń joǵary deńgeıdegi sporttyq jarystardy ótkizýge múmkindik beredi.
Jergilikti atqarýshy organdardyń memlekettik qyzmetshileri arasyndaǵy respýblıkalyq spartakıada 2022 jyldan beri ótkizilip keledi. Buǵan deıin jarysty Petropavl, Taldyqorǵan, Aqtóbe jáne Óskemen qalalary qabyldaǵan bolatyn. Bıyl bul mártebeli sport dodasyn ótkizý quqyǵy alǵash ret Aqmola oblysyna berildi.
Aýqymdy dodaǵa Qazaqstannyń barlyq 17 oblysynan, sondaı-aq respýblıkalyq mańyzy bar Astana, Almaty jáne Shymkent qalalarynan quralǵan komandalar qatysady. Memlekettik qyzmetshiler sporttyń 10 túri boıynsha baq synaıdy. Atap aıtqanda:
• fýtzal;
• voleıbol;
• 3×3 basketbol;
• toǵyzqumalaq;
• shahmat;
• qazaq kúresi;
• ústel tennısi;
• júzý;
• úlken tennıs;
• kıbersport.
Aıta keteıik, úlken tennıs pen kıbersport Spartakıada tarıhynda alǵash ret resmı jarys baǵdarlamasyna engizilip otyr.
Jarystardy joǵary deńgeıde uıymdastyrý jáne qatysýshylardyń kóptigin eskere otyryp, Kókshetaý qalasynyń jetekshi sport nysandary jumyldyrylady:
• Kokshe Arena kópfýnktsıonaldy sport kesheni;
• «Oqjetpes» ortalyq stadıony jáne «Býrabaı» sport saraıy;
• jeńil atletıka maneji men mamandandyrylǵan tennıs ortalyǵy;
• № 3 jáne № 7 olımpıadalyq rezervtiń mamandandyrylǵan balalar-jasóspirimder sport mektepteriniń bazalary;
• № 20 mektep-gımnazııasynyń sport kesheni.
Respýblıkalyq spartakıada tek adal sporttyq básekeniń alańy ǵana emes, sonymen qatar óńiraralyq kásibı baılanystardy nyǵaıtýǵa, tájirıbe almasýǵa jáne memlekettik qyzmetshiler arasynda salaýatty ómir saltyn keńinen nasıhattaýǵa yqpal etetin mańyzdy alań bolmaq.
Eske salaıyq, buǵan deıin Kókshetaýdaǵy «Kókshe-Arena» bazasynda memlekettik aýdıtorlar arasyndaǵy respýblıkalyq spartakıadanyń soltústik aımaqtyq kezeńi bastalǵanyn jazǵanbyz.
