Kókshetaýdaǵy muz arenasy nege eki jarym jyl boıy bos tur
ASTANA. KAZINFORM – Jergilikti sheneýnikterdiń aıtýynsha, jańa muz arenasy tóńiregindegi jaǵdaı áli núktesi qoıylmaǵan másele bolyp tur. Jumys atalǵan nysannyń barlyq qujaty qoldanystaǵy zańnamaǵa sáıkestendirilgennen keıin bastalady.
Saryarqa shaǵynaýdanynyń turǵyndary men hokkeı jankúıerleri kólemi 26×56 metr bolatyn hokkeı korty bar muz arenasy esigi qaıta aıqara ashylady dep úmittenedi. Alaıda qazir nysan bos tur, onyń aýmaǵyna kirýge shekteý qoıylǵan.
Osy kúnge deıin nysan taǵdyryna qatysty is sotta birneshe ret qaraldy. Másele jer daýynan bastalǵan. Bıyl mamyrda Aqmola oblysynyń mamandandyrylǵan aýdanaralyq ekonomıkalyq soty daýǵa núkte qoıdy. Talapker - Aqmola oblysynyń jer resýrstaryn basqarý departamenti, jaýapkerler - arenany salǵan «Qazaq Union» JShS, «KOKSHE» ÁKK» AQ jáne Kókshetaý qalasynyń jer qatynastary, sáýlet jáne qala qurylysy bólimi.
Máseleniń máni
2021 jylǵy maýsymda «KOKSHE» ÁKK» AQ-qa Kókshetaý ákimdiginiń qaýlysyna sáıkes, jabyq muz arenasyn salý jónindegi birlesken ınvestıtsııalyq jobany iske asyrý úshin 4 gektar jer ýchaskesin jeti jyl merzimge ýaqytsha jer paıdalaný quqyǵymen (jaldaý quqyǵyn satyp alý shartymen) berý týraly sheshim qabyldanǵan.
Birneshe kúnnen keıin qaladaǵy jer qatynastary bólimi men «KOKSHE» ÁKK» AQ arasynda jerdi jalǵa alý jáne ýaqytsha jer paıdalaný quqyǵyn satý týraly kelisimshart jasaldy. Keıin 2021 jylǵy 21 maýsymda, «KOKSHE» ÁKK» AQ «Qazaq Union» JShS-men «Hokkeıge arnalǵan jabyq muz arenasyn qosalqy úı-jaımen birge salý» atty áleýmettik jobany júzege asyrý jóninde birlesken qyzmet týraly shartqa qol qoıdy.
Al 2023 jylǵy mamyrda Kókshetaý ákimdigi «Qazaq Union» JShS-ne atalǵan jer ýchaskesine jeke menshik quqyǵyn berip, taraptar jerdi satý-satyp alý kelisimin jasady.
Jer resýrstaryn basqarý departamenti joǵaryda atalǵan mámileler zań talaptaryna saı kelmeıdi dep eseptep, sotqa júgindi. Talapkerdiń dereginshe, jer ýchaskesi berilgen kezde muz arenasyn salý josparlanǵan aýdannyń egjeı-tegjeıli josparlaý jobasy ázirlenip, bekitilmegen. Osy negizde departament jer qatynastary bólimi, «KOKSHE» ÁKK» AQ jáne «Qazaq Union» JShS arasynda jasalǵan úsh shartty jaramsyz dep tanýdy surady.
Sot anyqtaǵandaı, jer ýchaskesi berilgen sátte egjeı-tegjeıli josparlaý jobasy rasynda bolmaǵan. Ol Kókshetaý qalasy ákimdiginiń qaýlysymen tek 2021 jyldyń qyrkúıeginde, ıaǵnı daýly sharttar jasalǵannan keıin bekitilgen.
Sonymen qatar sot Jer kodeksi men «Sáýlet, qala qurylysy jáne qurylys qyzmeti týraly» zańnyń normalaryna súıenip, memlekettik menshikke jatatyn jer ýchaskelerin berý tek konkýrs (aýktsıon) arqyly júzege asyrylýy tıis ekenin atap ótti, eger zańda ózgeshe kózdelmese.
Sondaı-aq sot «KOKSHE» ÁKK» men «Qazaq Union» arasyndaǵy uqsas daýǵa baılanysty buryn zańdy kúshine engen sheshimdi de eskerdi. Ol sheshim boıynsha bir shart jaramsyz dep tanylǵan, sebebi jer ýchaskesin berý konkýrstyq rásimsiz ótken.
Nátıjesinde sot otyrysy qorytyndysy boıynsha Kókshetaý qalasynyń jer qatynastary, sáýlet jáne qala qurylysy bólimi, «KOKSHE» ÁKK» AQ jáne «Qazaq Union» JShS arasynda jasalǵan úsh shartty jaramsyz dep tanydy.
Sheneýnikter ne deıdi
Kókshetaý qalasy ákimdiginiń habarlaýynsha, «KOKSHE» ÁKK» AQ da birlesken jobanyń qatysýshysy retinde Aqmola oblysynyń mamandandyrylǵan aýdanaralyq ekonomıkalyq sotyna atalǵan jer ýchaskesiniń satý-satyp alý shartyn jaramsyz dep taný týraly talap aryz bergen.
- 2024 jylǵy 3 qyrkúıektegi sot sheshimimen talap qanaǵattandyryldy. 2023 jylǵy 26 mamyrda Kókshetaý qalasynyń jer qatynastary, sáýlet jáne qala qurylysy bólimi men «Qazaq Union» JShS arasynda jasalǵan №95 jer ýchaskesin satý-satyp alý sharty jaramsyz dep tanyldy. Sot jer ýchaskesin jeke menshikke berý zań talaptaryna jáne birlesken qyzmet shartynyń talaptaryna sáıkes kelmegenin anyqtady, - dep málimdedi vedomstvo.
Alaıda muz arenasy 2023 jylǵy 11 sáýirde paıdalanýǵa berilgen, atalǵan fakt qabyldaý aktisimen rastalǵan. Osyǵan baılanysty nysan ıesi Qazaqstan Respýblıkasynyń Jer kodeksiniń 52-babynda kózdelgen quqyqty paıdalanyp, ǵımaratqa menshik quqyǵy sol nysan ornalasqan jer ýchaskesine quqyq beretinin negizge alǵan.
- Qazir qujattardy qoldanystaǵy zańnamaǵa sáıkestendirý jumystary júrgizilip jatyr. Barlyq rásim aıaqtalǵannan keıin nysandy maqsatty paıdalaný tártibi aıqyndalady, - dep túsindirdi Kókshetaý ákimdiginen.
Aıta ketsek, Petropavlda halyqaralyq talaptarǵa saı muz arenasy salynyp jatyr.