Kókshetaýdaǵy áskerı kolledjdiń 300-den astam kadeti áli karantınde jatyr

ASTANA. KAZINFORM — QR Qorǵanys mınıstrligine qarasty Shoqan Ýálıhanov atyndaǵy áskerı kolledjiniń 334 kýrsanty men áskerı qyzmetkeri áli karantınde jatyr.

Aqmola oblystyq densaýlyq saqtaý basqarmasynyń basshysy Narıman Ermek em alýdy jalǵastyryp jatqan kýrsanttar týraly sońǵy málimetterdi aıtty.

— 2026 jyldyń 4 aqpanyndaǵy jaǵdaı boıynsha juqpaly aýrýlar ortalyǵynda 42 kýrsant emdelip jatyr. Onyń 38-i 18 jasqa deıingi balalar bolsa, 4-ýi mindetti áskerı boryshyn ótep júrgen sarbaz. Budan bólek 60 naýqas emdeldi. Olardyń barlyǵy ınfektsııadan keıingi oqshaýlaý bólimshesinde baqylaýda bolady, — deıdi Narıman Ermek.

Qazir provızorda 84 kadet baqylaýda, onyń 82 — si 18 jasqa deıingi balalar. Karantınde — 334 adam, onyń 241-i — oqýshy, 93-i — áskerı qyzmetshiler.

— Qazirgi tańda naýqastardyń barlyǵynyń jaǵdaıy qanaǵattanarlyq, aýyr jaǵdaı joq. Olardyń barlyǵy emdelip jatyr, aıtarlyqtaı oń ózgeris bar. Dıagnozdarǵa keletin bolsaq, qyzylsha dıagnozy qoıylǵan 24 naýqas qazirgi ýaqytta dıagnostıkalyq jáne emdeý hattamasyna sáıkes juqpaly aýrýlar ortalyǵynda em qabyldap jatyr. Qalǵandaryna jiti respıratorlyq vırýstyq ınfektsııa dıagnozy qoıylyp, olarǵa tıisti medıtsınalyq kómek kórsetilýde, — dedi oblystyń bas dárigeri.

Medıtsına qyzmetkerleri azamattyq jáne áskerı salanyń sanıtarlyq-epıdemıologııalyq baqylaý qyzmetimen birlesip, ınfektsııaǵa qarsy barlyq qajetti sharalardy júrgizip jatyr. Sonyń ishinde kolledj ishinde de, Býrabaı aýdany boıynsha da ınfektsııanyń taralýyn boldyrmaý úshin emdeý, aldyn alý sharalary qolǵa alynǵan.

— Kolledjden tys jerde juqtyrýdyń rastalǵan jaǵdaılary bolǵan joq, sondyqtan ony syrttan ákeldi dep esepteımiz. Kolledjge syrttan qyzylsha syrqatyn juqtyryp kelip, ol tarady, odan keıin basqa da jiti respıratorlyq vırýstyq ınfektsııalar paıda boldy, — dep qosty Narıman Ermek.

Buǵan deıin Kókshetaýdaǵy áskerı kolledjde qyzylsha derti tarap, 66 kadet aýyryp jatqandyǵy jóninde jazdyq.