Kókshetaýda jylý máselesin sheshý úshin qosymsha qazandyqtar qoıylmaq
KÓKShETAÝ. QazAqparat - Bıylǵy qysta Aqmola oblysynda jylýmen qamtý máselesine qatysty shaǵymdardyń sany rekordtyq deńgeıge jetti.
Bul másele qalaı sheshilip jatyr jáne kelesi jylytý maýsymyna daıyndyq týraly aımaq basshysy Ermek Marjyqpaev esep berý kezdesýinde aıtyp berdi, dep habarlaıdy QazAqparat tilshisi.
«Kókshetaý qalasy jyldan jylǵa úlkeıip keledi, al jylý kózderi sol kúıinde qalyp otyr. Bul 70 Gkal úsh qazandyq RK-1, 100 Gkal úsh qazandyq RK-2. Jalpy, qala boıynsha 510 Gkal. Jylýmen jabdyqtaýdy jaqsartý úshin, bıylǵy jyldyń tamyz aıynda biz gaz-mazýt qazandyǵyn paıdalanýǵa beremiz. Bul 100 Gkal, ıaǵnı jylý mólsherin besten bir esege arttyramyz. Sonymen qatar, osyǵan uqsas taǵy bir qazandyq satyp alynady. Jalpy, biz jylý qaýatyn 700 Gkal-ǵa jetkizemiz. Bul bizdiń qalamyzdyń jylýyn turaqtandyrady», - dep atap ótti Ermek Marjyqpaev turǵyndardyń saýalyna.
Sondaı-aq, úsh kómir qazandyǵyn jańǵyrtýmen birge, qýaty 120 Gkal tórtinshi qazandyqtyń qurylysynyń jobalyq-smetalyq qujattamalary ázirlenýde. Jalpy alǵanda, qýaty 408 Gkal bolatyn kómir qazandyǵy tórteý bolady.
«Turǵyndarǵa aıtarym, qalada páter ıeleri kooperatvıteriniń jumysy boıynsha máseleler bar. Keıbir turǵyn úılerdiń kireberisteriniń esikteri joq, terezeleri synǵan, jertóleler ashyq, úıishilik jylý jelileri óz qalaýy boıynsha ózgertilgen. Munyń barlyǵy, árıne, jylý berý sapasyna keri áser etetini sózsiz. Bıylǵy jazda osy máseleni birlesip qolǵa alyp, bir tártipke keltiremiz jáne jańa jylytý maýsymyn oıdaǵydaı bastaımyz», - dep tolyqtyrdy aımaq basshysy.
