Kókshetaýda jylý elektr ortalyǵyn salýǵa qansha qarajat kerek
NUR-SULTAN. QazAqparat – QR Premer-Mınıstri Álıhan Smaıylov Kókshetaýda jylý elektr ortalyǵyn salýǵa qatysty pikir bildirdi, dep habarlaıdy QazAqparat tilshisi.
«Búgingi tańda jobanyń tehnıkalyq-ekonomıkalyq negizdemesin túzetý jumysy aıaqtaldy, memlekettik saraptamanyń oń qorytyndysy bar. Tehnıkalyq-ekonomıkalyq negizdemege sáıkes otynnyń negizgi túri – tas kómir, bul rette JEO-ny gazǵa aýystyrý múmkindigi qarastyrylǵan. Elektr stantsııasynyń qýaty – 240 MVt, jylý qýaty – 520 Gkal/saǵat. Qurylystyń jalpy quny – 239,5 mlrd teńge», - delingen Úkimet basshysynyń Senat depýtattarynyń saýalyna bergen jaýabynda.
Premer-Mınıstrdiń atap ótýinshe, negizgi tehnıkalyq sheshimderde Kókshetaý qalasynyń qoldanystaǵy jylý energııasyn óndirý obektileriniń (QR-1, QR-2 qazandyqtary) ınfraqurylymyn paıdalaný josparlanǵan. Bul joba boıynsha shyǵyndardy tómendetedi. Jobany iske asyrý jónindegi vedomstvoaralyq jobalaý toby quryldy. Onyń quramyna múddeli memlekettik organdardyń, uıymdardyń jáne salalyq qaýymdastyqtardyń ókilderi kirdi. Jobany iske asyrýdyń kezeńderi men merzimderi aıqyndalǵan tıisti jol kartasy bekitildi. Qazirgi ýaqytta joǵaryda kórsetilgen vedomstvoaralyq jobalaý tobynyń qyzmeti aıasynda jobany iske asyrý boıynsha odan arǵy is-sharalar pysyqtalýda.
«Jobany iske asyrýdyń ońtaıly nusqasyn aıqyndaý maqsatynda Úkimet «Elektr energetıkasy týraly» Qazaqstan Respýblıkasynyń Zańy aıasynda elektr qýatynyń naryǵy arqyly qarjylandyrý men ınvestıtsııalardy qaıtarýdyń yqtımal tetigin qarastyryp jatyr. Osy jumystyń qorytyndysy boıynsha básekelestik negizde zańnamada kózdelgen konkýrstyq rásimder aıasynda ınvestordy irikteý qamtamasyz etiletin bolady. Baıandalǵannyń negizinde jobanyń áleýmettik jáne strategııalyq mańyzdylyǵyn eskere otyryp, ony jedeldetý jáne iske asyrý máseleleri Qazaqstan Respýblıkasy Úkimetiniń turaqty baqylaýynda bolady», - dep atap ótedi Álıhan Smaıylov.
