Kókshetaýda júrgizýshi kýáliginen aıyrylǵan mas júrgizýshi qashý kezinde qorshaýǵa soǵyldy
ASTANA. KAZINFORM – Kókshetaýda polıtseılerden qashpaq bolǵan mas júrgizýshi temir qorshaýǵa soǵyldy. Belgili bolǵandaı, er adam eki jyl buryn dál osyndaı quqyq buzýshylyq úshin júrgizýshi kýáliginen aıyrylǵan.

Aqmola oblystyq polıtsııa departamentiniń málimetinshe, oqıǵa 18 qazan kúni túngi saǵat bir shamasynda bolǵan. Patrýldik polıtsııa batalonynyń qyzmetkerleri dúkenderdiń birinen shyǵyp kele jatqan BMW markaly kólikti baıqaıdy.
«Kólik patrýldik mashınany kóre sala jyldamdyǵyn baıaýlatty, bul polıtseılerge kúdik týdyrdy. Tártip saqshylary júrgizýshini toqtatýǵa sheshim qabyldaǵan, alaıda ol zańdy talapty elemeı, kerisinshe, jyldamdyǵyn arttyryp, qashýǵa tyrysqan», – delingen vedomstvo habarlamasynda.
Polıtseıler jol qozǵalysyna qaýip tóndirmeı, kólikti qýýǵa kirisip, jaǵdaıdy Ortalyq jedel basqarý ortalyǵynyń ınspektorlarymen úılestirip otyrǵan. Alaıda júrgizýshini qaýipsiz jolmen toqtatý múmkin bolmaǵan: ol rólge ıe bola almaı, joǵary jyldamdyqpen temir qorshaýǵa soǵylǵan.
Tekserý kezinde er adamnyń orta dárejedegi mas kúıinde bolǵany jáne onyń eki jyl buryn da dál osyndaı áreketi úshin júrgizýshi kýáliginen aıyrylǵany anyqtaldy.
Osy derek boıynsha kólik quralyn mas kúıinde jáne júrgizýshi kýáliginsiz basqarǵany úshin sotqa deıingi tergeý bastaldy.
Aıta keteıik, buǵan deıin Aqmola oblysynda adam óltirý, urlyq deregi boıynsha izdeýde júrgender ustaldy.