Kókshetaýda júrgizýshige tapansha kezegen kúdiktiler ustaldy
KÓKShETAÝ. QazAqparat – Kókshetaýda beıtanys júrgizýshini tapanshamen qorqytqandar beınebaqylaý kamerasy arqyly ustaldy, dep habarlaıdy QazAqparat tilshisi.
Aqmola oblystyq Polıtsııa departamenti baspasóz qyzmetiniń málimetinshe, 16 qazanda Kókshetaý qalalyq polıtsııa bólimine 29 jastaǵy kólik júrgizýshisi aryzdanǵan. Zardap shegýshiniń sózinshe, sol kúni saǵat 11:15-te Áýezov kóshesiniń boıynda beıtanys eki er adam ony tapanshaǵa uqsas zatpen qorqytyp, jetkizip salýdy talap ekten.
«Oqıǵa ornyna barǵan tártip saqshylary «Arıgato» dámhanasynyń mańynda beıtanys eki er adamnyń «Mazda» kóligine otyryp, júrgizýshini tapanshaǵa uqsas zatpen qorqytqanyn anyqtady. Júrgizýshiniń sózinshe, kúdiktilerdiń biriniń bet beınesi azıattyqqa, ekinshisi eýropalyqqa uqsas. Bireýi ústine áskerı kamýflıaj kúrtke, ekinshisi qara tústi kúrtke men kók tústi djınsy kıgen», - dedi vedomstvodan.
Jedel-izdestirý sharasy barysynda Jedel basqarý ortalyǵynyń beınebaqylaý kamerasy arqyly 29 jáne 28 jastaǵy eki er adam ustaldy. Kúdiktilerdiń biri SQO Aıyrtaý aýdanynyń, ekinshisi Kókshetaý qalasynyń turǵyny. Olardy ustaý kezinde pnevmatıkalyq tapansha tárkilendi.
«Qazirgi kezde saraptama taǵaıyndaldy. Kúdiktilerdiń ústinen QR QK 293-babynyń 2-bóligi «buzaqylyq» boıynsha qylmystyq is qozǵaldy. Tergeý sharalary jalǵasýda», - dep tolyqtyrdy vedomstvodan.
