Kókshetaýda júrgizýshi jolaýshyny qaǵyp, oqıǵa ornynan qashyp ketti
KÓKShETAÝ. QazAqparat - Kókshetaýda jaıaý júrginshini qaǵyp, mert qylǵan júrgizýshi ustaldy, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.
Vedomstvonyń málimeti boıynsha, aqpannyń 2-de saǵat 16:13 shamasynda Kókshetaý qalasynda Saın kóshesiniń boıymen júrip kele jatqan «Volkswagen Passat» kóliginiń júrgizýshisi joldyń ruqsat etilmegen jerinen ótpek bolǵan 57 jastaǵy er adamdy qaǵyp ketken.
Jol-kólik oqıǵasynan keıin júrgizýshi polıtsııaǵa habarlamastan oqıǵa ornynan izin sýytqan. Er adam alǵan dene jaraqatynan oqıǵa ornynda kóz jumǵan.
«Jedel-izdestirý sharasy kezinde «Tulpar - 10» patrýldik polıtsııa ekıpajy jedel basqarý ortalyǵynyń beınebaqylaý kamerasy arqyly «Volkswagen Passat» kóliginiń 29 jastaǵy júrgizýshisin «Petropavl-Nur-Sultan» tas jolynyń boıyndaǵy «Best» janar-jaǵar maı quıý stansasy mańynda ustaldy. Belgili bolǵandaı, 29 jastaǵy júrgizýshi mas kúıinde kólik basqarǵan úshin 2018 jyldyń 1 maýsymynda 3 jylǵa kólik júrgizý quqyǵynan aırylǵan», - dedi vedomstvodan.
Qazirgi kezde, QR QK 345-babynyń 3-bóligi boıynsha sotqa deıingi tergeý amaldary júrgizilýde. Oqıǵanyń mán-jaıy anyqtalý ústinde.
