Kókshetaýda «Juldyzaı-2017» oblystyq festıvali ótýde
KÓKShETAÝ. QazAqparat - Kókshetaýda múmkindigi shekteýli balalar arasynda «Juldyzaı-2017» oblystyq festıvali ótýde, dep habarlaıdy «QazAqparat» HAA tilshisi.
Jyl saıyn dástúrli túrde ótetin baıqaýǵa bul joly oblystyń ár óńirinen kelgen múmkindigi shekteýli 200-ge jýyq jas daryn qatysyp, baq synaýda. Alty atalym boıynsha ótetin baıqaýdyń qorytyndysyna saı tańdaýlylar aǵymdaǵy jyldyń birinshi maýsymynda Almaty qalasyndaǵy Respýblıka saraıynda uıymdastyrylatyn gala-kontsertke qatysatyn bolady.
Baıqaý qatysýshylarynyń barlyǵy derlik aımaqtaǵy jalpy jáne orta arnaıy mektepterde oqıtyn tirek-qımyl apparaty buzylǵan, psıhıkalyq damý deńgeıi tejelgen, estý jáne kórý qabiletterinen aıyrylǵan múgedek balalar. Uıymdastyrýshylardyń aıtýynsha, bul festıval múmkindigi shekteýli balalardyń ishte buǵyp jatqan qarym-qabiletterin ashyp, áleýmettik ortaǵa beıimdelýine yqpal etedi.
Sondaı-aq, atalǵan shara memlekettik organdar men bıznes qurylymdarynyń jáne qoǵamdyq birlestikterdiń balalar shyǵarmashylyǵyna beı-jaı qaramaýyna jaǵdaı týǵyzý úshin jasalynyp otyrǵan kórinedi.
Eske sala keteıik, 11 jyldyq tarıhy bar «Juldyzaı» festıvaline Qazaqstannyń túkpir-túkpirindegi barlyǵy 30 000 bala qatysqan. Onyń ishinde 7000 bala Astana sahanalarynda óner kórsetti. Joba nátıjesine saı kóptegen balalar elimizdiń joǵary oqý oryndarynda shyǵarmashylyqtaryn jalǵastyrdy.
