Kókshetaýda jóndeýden ótken joldardyń sapasy tómen - Antıkor

KÓKShETAÝ. QazAqparat – Kókshetaýda qoǵamdyq monıtorıng qorytyndysy boıynsha avtojoldardy jóndeý sapasynyń tómendigi anyqtaldy, dep habarlaıdy QazAqparat tilshisi Aqmola oblysy boıynsha sybaılas jemqorlyqqa qarsy is-qımyl departamentine silteme jasap.

Keńeske Kókshetaý qalasynyń ákimi Baýyrjan Ǵaısa, oblystyń Sybaılas jemqorlyqqa qarsy qyzmetiniń ókilderi, «Ádildik joly» RQB atqarýshy dırektory Dıdar Smaǵulov, depýtattar, jurtshylyq ókilderi, memlekettik organdar men uıym basshylary qatysty.

Jıynda sybaılas jemqorlyqqa qarsy is-qımyl departamenti preventsııa basqarmasynyń basshysy Janat Turalınov avtojoldar salasy oblystyń sybaılas jemqorlyq táýekelderi kartasyna engizilgenin, sondaı-aq, Kókshetaý qalasynyń avtojoldaryn jóndeýge júrgizilgen monıtorıng qorytyndysy boıynsha anyqtalǵan birqatar kemshilikti málim etti.

«Qoǵamdyq monıtorıng anyqtaǵandaı, jekelegen merdigerlik uıymdar jol jumystary boıynsha óz mindettemelerin tıisti túrde oryndamaıdy. Bul rette memlekettik organdar atynan tapsyrys berýshiler jumystyń sapaly oryndalýyn tıisti baqylaýǵa almaıdy. Mysaly, ótken jyly kásiporyndardyń biri 397 mln teńgege qalanyń kóshe-jol jelisine ortasha jóndeý júrgizgen, alaıda keıbir ýchaskeler boıynsha jol jamylǵysynyń shógýi jáne jaryqtary bary anyqtaldy. Krasnoıar aýylynda da jol jóndeý jumysynyń sapasyz jasalǵany belgili boldy. Onda jalpy somasy 440 mln teńgege eki kompanııa jumys júrgizgen», - dedi Janat Turalınov

Sonymen birge, ol tapsyrys berýshiler men merdigerlerge kepildik mindettemeleri sheńberindegi aqaýlardy qysqa merzimde joıý, sol arqyly qandaı da bir quqyq buzýshylyqtardy boldyrmaý jáne halyq tarapynan synǵa túsýge jol bermeý qajettigin atap ótti.

Aıta ketsek, budan buryn Kókshetaýda birneshe kósheni sý basqanyn jazǵan edik.