Kókshetaýda jol apaty kezinde 500 lıtr dızel jolǵa tógilip qaldy
KÓKShETAÝ. QazAqparat – Aqmolalyq qutqarýshylar abaısyzda jerge tógilgen 500 l dızel otynynyń janýyna jol bermedi, dep habarlaıdy QazAqparat.
Oblystyq TJD baspasóz qyzmetiniń málimetinshe, apattyq-qutqarý jumystary keshe túnde Kókshetaý qalasyndaǵy Naýan Haziret meshiti mańynda júrgizilgen.
«Nazarbaev dańǵylynda kele jatqan júk kóligi dóńgelegimen qudyqty basyp ótken. Aýyr salmaqqa shydamaǵan qudyqtyń qaqpaǵy aýdarylyp, avtokóliktiń janarmaı quıatyn bagyn tesip jiberdi. Saldarynan 500 lıtr dızel otyny 50 sharshy metr aýmaqqa tógilgen», - dep málim etti vedomstvodan.
Qutqarýshylardyń aıtýynsha, tótenshe jaǵdaıdyń aldyn alý úshin barlyq sharalar jasalǵan. Olar oqıǵa ornyna kóbik jaýdyrdy. Zardap shekkender joq.
Júk kóliginiń rólindegi Belarýs azamaty tez arada kómekke kelgen qutqarýshylarǵa alǵys aıtty.
