Kókshetaýda joǵary tehnologııalyq jańa dıirmen kesheni ashyldy
KÓKShETAÝ. QazAqparat - Tuńǵysh Prezıdent kúni qarsańynda Kókshetaýdaǵy «Agrimer-Astyk» JShS-de bıdaıdyń qatty sortynan un shyǵaratyn joǵary tehnologııalyq jańa dıirmen kesheni ashyldy, dep habarlaıdy QazAqparat tilshisi Aqmola oblysy ákiminiń baspasóz qyzmetine silteme jasap.
Kásiporynnyń ashylýyna aımaq basshysy Ermek Marjyqpaev qatysyp, qutty sóz sóıledi.
«Elimiz úshin úlken, mańyzdy merekeler – Tuńǵysh Prezıdent kúni jáne Táýelsizdik kúni qarsańynda jańa kásiporyndardy iske qosý jaqsy dástúrge aınalǵan. Elbasy Nursultan Ábishuly Nazarbaev bizge 2022 jylǵa deıin eńbek ónimdiligi men qaıta óńdelgen ónimderdiń eksportyn 2,5 jarym esege arttyrý týraly mindetter qoıyp otyr.
Biz búgin bıdaı óńdeý kólemin ulǵaıtýǵa múmkindik beretin joǵary tehnologııalyq jańa dıirmen keshenin ashyp otyrmyz. Óńirdiń agroónerkásip kesheniniń damýyna úles qosyp otyrǵan kásiporyn basshysy Nıkolaı Kazak pen ujym eńbekkerlerine shynaıy alǵysymdy bildiremin», - dedi aımaq basshysy Ermek Marjyqpaev.
Kásiporyn ıtalııandyq qural-jabdyqtarmen jabdyqtalǵan. Italııanyń «Barilla» azyq-túlik kompanııasy «Agrimer-Astyk» JShS áriptesi bolyp tabylady. Máskeýde ózderiniń brendtik ónimi – pastaǵa Kókshetaýdyń jarmasyn, premıým-klasstaǵy makaron ónimderine unyn paıdalanbaq nıette.
Jalpy, jobaǵa 2,5 mıllıard teńge qarjy salǵan. «Damý» kásipkerlikti damytý qory tarapynan 790 mıllıonnan astam teńge kóleminde qarjylaı qoldaý kórsetilgen.
